नेकपा (एमाले)का उपमहासचिव प्रदीप ज्ञवालीले पूर्वराष्ट्रपति विद्यादेवी भण्डारीले एमालेलाई कमजोर बनाउने खालका कुनै पनि काम गर्न नहुने बताएका छन्।
शनिबार प्रेस चौतारी नेपालले काठमाडौंमा आयोजना गरेको अन्तरसंवाद कार्यक्रममा बोल्दै उपमहासचिव ज्ञवालीले एमालेले राष्ट्रपति जस्तो सम्माननीत र गरिमामय पदमा पुर्याएकाले सो पार्टीलाई कमजोर बनाउने खालको गतिविधि पूर्वराष्ट्रपति भण्डारीले गर्न नहुने बताएका हुन्।
'आफ्नो कुनै निश्चित चाहना पूरा भएनन् भने फर्केर त्यही संस्थालाई कमजोर गर्ने गरी कुनै पनि काम कसैले पनि गर्नु हुँदैन भन्ने कुरा हामीलाई थाहा छ । हामी उहाँलाई सिंगै देशको अभिभावकको रुपमा देख्न चाहन्छौं,' उनले भने।
उपमहासचिव ज्ञवालीले पूर्वराष्ट्रपति भण्डारी भण्डारीको पदीय गरिमा र व्यक्तित्वलाई सम्मान गर्न पनि दलगत राजनीतिमा आउन दिन नहुने तर्क गरे।
'संविधानको धारा ६२ को उपधारा ६ हेर्नु भयो भने निर्वाचित भएको भएपनि, मनोनित भएको भएपनि वा नियुक्त भएको होस् । जुनसुकै जिम्मेवारीमा भएपनि त्यो पदमा निर्वाचित हुने वित्तिकै त्यो सबै पदहरुबाट स्वतह मुक्त हुने संविधानको धारा ६२ को उपधारा ६ ले त्यो भन्छ,' उनले भने।
उनले राष्ट्रपति, उपराष्ट्रपति जस्ता उच्च ओहोदा गणतन्त्रका प्रतिकहरु रहेको बताए।
उपमहासचिव ज्ञवालीले आगामी महाधिवेशनमा पनि पार्टीको नेतृत्वमा केपी शर्मा ओलीको विकल्प नभएको बताए।
ओलीलाई पार्टीको नेतृत्वमा निरन्तरता दिने कुरामा पार्टी भित्र कुनै विवाद नरहेको पनि उनले बताए। —न्युज एजेन्सी नेपाल
-1746009348.jpg)
