राष्ट्रिय प्रजातन्त्र पार्टी (राप्रपा) को अनुशासन समितिले काठमाडौं र सुर्खेत जिल्लाका चार-चार जना नेताहरूमाथि कारबाही गर्ने तयारी गरेको छ।
उनीहरूमाथि अनुशासन समितिले स्पष्टीकरण सोधेकोमा प्राप्त भइसकेको र त्यसको बेहोरा अध्ययनकै क्रममा छ। सम्भवत अर्को साता बस्ने अनुशासन समिति बैठकले ८ नेतामाथि कारबाही गर्नेछ।
राप्रपा अनुशासन समिति अध्यक्षमा पार्टीकी उपाध्यक्ष तथा प्रतिनिधि सभा सांसद रोशन कार्की छिन्। असार २५ गते नवराज सुवेदीलाई अनुशासन समिति अध्यक्षबाट हटाएर अध्यक्ष राजेन्द्र लिङ्देनले कार्कीलाई सो पदमा मनोनीत गरेका थिए।
त्यसपछि अनुशासन समितिले पार्टी नेतृत्वविरूद्ध अभिव्यक्ति नदिन नेताकार्यकर्ताहरूलाई भनेको थियो।
अब हामी राप्रपा अनुशासन समितिले स्पष्टीकरण सोधेका काठमाडौंका ४ जना नेता को हुन् र उनीहरूमाथिका आरोप के छन् भन्ने चर्चा गरौं।
सहायक प्रवक्ता प्रविन थोकर तामाङ, काठमाडौं जिल्ला अध्यक्ष नवराज सिंखडा, क्षेत्र नम्बर ४ का अध्यक्ष रिद्धीप्रताप राणा र राष्ट्रिय प्रजातान्त्रिक युवा संगठनका ज्योति लामामाथि अनुशासन समितिले स्पष्टीकरण सोधेकोमा उनीहरूले स्पष्टीकरण पनि बुझाइसकेका छन्।
उनीहरूमाथि स्पष्टीकरण सोध्नुको मुख्य कारण- साउन २८ गते राष्ट्रिय प्रजातान्त्रिक युवा संगठन काठमाडौं जिल्ला अधिवेशनमा गरिएका गतिविधिलाई लिएर हो।
उक्त अधिवेशन उद्घाटन गर्न अध्यक्ष राजेन्द्र लिङ्देन पुगेका थिए। तर त्यहाँ संस्थापन र संस्थापनइतर पक्षबीच विवाद देखा परेको थियो भने अध्यक्ष लिङ्देनकै अगाडि हात हालाहालको अवस्था बनेको थियो। त्यसपछि अध्यक्ष लिङ्देनले यस किसिमका अराजक गतिवधि स्वीकार्य नहुने भन्दै अधिवेशन नै स्थगित गरिदिएका थिए।
‘राष्ट्रिय प्रजातान्त्रिक युवा संगठनको काठमाडौं अधिवेशन स्थलमा अधिवेशनलाई नै प्रभावित पार्ने नियतका साथ सहायक प्रवक्ता प्रविन थोकर तामाङको नेतृत्वमा अराजक गतिविधि गरेको पाइयो, त्यसपछि उक्त कार्यमा संलग्न रहेका चार जनामाथि स्पष्टीकरण सोधिएको हो, स्पष्टीकरण प्राप्त भइसकेको छ भने हामी अध्ययनकै क्रममा छौं,’ राप्रपा अनुशासन समिति स्रोतले भन्यो।
अध्यक्ष लिङ्देनले राष्ट्रिय प्रजातान्त्रिक युवा संगठनको जिल्ला अधिवेशन स्थगितको घोषणा गरेपछि ज्योति लामाले आफूलाई नै अध्यक्ष घोषणा गरेका थिए। साथै जिल्ला अधिवेशन तोकिएकोभन्दा बाहिर नजिकैको अर्को पाटी प्यालेसमा मानिसहरू भेला गरी प्रशिक्षण गरेको आरोप छ।
‘पार्टीको अनुशासनविपरीत र मर्यादाविपरीत हुने गरी गतिविधि गरेकोले कारबाही किन नगर्ने भनेर उनीहरूमाथि स्पष्टीकरण सोधेका थियौं,’ अनुशासन समिति स्रोतले भन्यो, ‘पूर्वआइजीसमेत रहेका राप्रपा नेता ठाकुरमोहन श्रेष्ठमाथि पार्टी बैठकमै आक्रमणमा संलग्न रही कारबाहीमा परिसकेका क्षेत्र नम्बर ४ का अध्यक्ष रिद्धीप्रताप राणा साउन २८ को जिल्ला अधिवेशन भाँड्न पनि संलग्न रहेको देखियो। सबैको स्पष्टीकरण अध्ययनपछि निर्णयमा पुग्छौं।’
साथै राप्रपा सुर्खेतका ४ जना नेतामाथि पनि स्पष्टीकरण सोधिएको छ।
केन्द्रीय सदस्यद्वय जनक सिंह, भीमबहादुर शाही, युवा संगठनका नेता प्रेम बिसी र सुर्खेत जिल्ला कार्यसमिति उपाध्यक्ष लक्ष्मीकुमारी सार्कीमाथि राप्रपा अनुशासन समितिले स्पष्टीकरण सोधेको र उनीहरूबाट पनि स्पष्टीकरण प्राप्त भइसकेको अनुशासन समितिले जनाएको छ।
यी नेताहरूमाथि के आरोप छन्, त्यसबारे चर्चा गरौं।
मुख्य गरी यी नेताहरूमाथि मुकुन्दश्याम गिरीलाई सहयोग पुग्ने गरी गतिविधि गरेको आरोप छ। गिरीको गृहजिल्ला सुर्खेत हो।
साउन २ गते अध्यक्ष राजेन्द्र लिङ्देनले उपाध्यक्ष तथा केन्द्रीय सदस्य दुवै पदबाट मुकुन्दश्याम गिरीलाई पदमुक्त गरेका थिए।
गिरीले उपाध्यक्ष विक्रम पाण्डे, महामन्त्रीद्वय धवलशम्शेर राणा र कुन्तिकुमारी शाहीसँग मिलेर अध्यक्ष लिङ्देनका निर्णयमाथि चुनौती दिँदै विज्ञप्ति जारी गरेका थिए।
नवराज सुवेदीलाई अनुशासन समितिबाट पदमुक्त गरिएको विरोधमा साउन १ मा विज्ञप्ति जारी गरेका गिरीलाई भोलिपल्टै पदमुक्त गरिएको थियो। गिरीलाई अध्यक्ष लिङ्देनले नै उपाध्यक्ष पदमा मनोनीत गरेका थिए।
आफूले मनोनीत गरेका पदाधिकारीले आफैविरूद्ध गतिविधि, गुटबन्दी र घेराबन्दी गरेको भन्दै अध्यक्ष लिङ्देनले मनोनीत पदाधिकारीहरूलाई पदमुक्त गर्दै आएका छन्।
राप्रपा अनुशासन समिति अध्यक्ष रहेका नवराज सुवेदीको नेतृत्वमा चैत ४ गते राजसंस्था फर्काउन 'संयुक्त जनआन्दोलन समिति' गठन भएको थियो। सुवेदीले चैत ५ गते आयोजित कार्यक्रममा आफूले राप्रपा परित्याग गरेको घोषणा गरेका थिए।
सोही घोषणालाई आधार मानेर अध्यक्ष लिङ्देनले सुवेदीलाई अनुशासन समितिबाट हटाएर उक्त पदमा उपाध्यक्ष रोशन कार्कीलाई असार २५ गते मनोनीत गरेका थिए।
आफू राप्रपा केन्द्रीय सदस्य रहेको, अनुशासन समिति अध्यक्षसमेत रहेको र पार्टी सदस्यता लिखित रूपमा परित्याग नगरेको भन्दै सुवेदी निर्वाचन आयोग पुगेका थिए। अध्यक्ष लिङ्देनको निर्णय बदर गर्न माग गर्दै उनले निर्वाचन आयोगमा निवेदन दिएका हुन्। त्यसबेला सुवेदीलाई साथ दिन पुगेका थिए- मुकुन्दश्याम गिरी। पछि उनले सुवेदीलाई पुन: जिम्मेवारीमा फर्काउनुपर्ने मागसहित अरू नेताहरूसँग मिलेर विज्ञप्ति निकालेपछि अध्यक्ष लिङ्देनले पार्टी हितविपरीत कार्य गरेको भन्दै पदमुक्त गरेका थिए।
मुकुन्दश्याम गिरीलाई अध्यक्ष लिङ्देनले पदमुक्त गरेको विरोधमा कर्णाली प्रदेशका केन्द्रीय सदस्यहरूले हस्ताक्षर गरी निर्णय फिर्ता लिन अध्यक्ष लिङ्देनलाई दबाब दिएका थिए। त्यसबेला राप्रपा सुर्खेत कार्यालय तालाबन्दीसमेत गरिएको थियो।
पार्टी कार्यालय तालाबन्दी गर्न केन्द्रीय सदस्यद्वय जनक सिंह, भीमबहादुर शाहीले उक्साएको, युवा संगठनका नेता प्रेम बिसी तालाबन्दीमा संलग्न रहेको आरोप छ भने सुर्खेत जिल्ला कार्यसमिति उपाध्यक्ष लक्ष्मीकुमारी सार्कीले अनधिकृत रूपमा कार्यसमिति बैठक राखेको आरोप छ। यही आरोपमा राप्रपा अनुशासन समितिले उनीहरूलाई पार्टी हितविपरीत कार्य गरेको भन्दै कारबाही किन नगर्ने भनेर स्पष्टीकरण सोधेको थियो, उनीहरूले स्पष्टीकरणसमेत बुझाइसके।
राप्रपामा पछिल्लो समय अध्यक्ष राजेन्द्र लिङ्देन र उपाध्यक्ष विक्रम पाण्डे, महामन्त्री धवल शम्शेर राणा र कुन्तिकुमारी शाहीबीच मतभेद बढ्दो छ। संस्थापनइतर पक्ष विक्रम-धवलले अध्यक्ष लिङ्देनलाई पटक-पटक विज्ञप्ति र पत्राचार गरी विधानविपरीत कारबाही फिर्ता लिन र कार्यशैली सुधार गर्न र कार्यकर्ताहरूलाई आतंकित नपार्न भनिरहेका छन्।
तर नेतृत्वविरूद्ध लागेका र पार्टीहितविपरीत कार्य गरेको भन्दै अनुशासन समितिले नेता, कार्यकर्ताहरूमाथि स्पष्टीकरण सोध्ने र कारबाही गर्ने तयारी भइरहेको हो। यसअघि नवराज सुवेदी, सगुनसुन्दर लावती र मुकुन्दश्याम गिरीमाथि स्पष्टीकरण मौकासमेत नदिई कारबाही गरेको भन्दै अध्यक्ष लिङ्देनको कार्यशैलीको विक्रम-धवल-कुन्तिकुमारीले विरोध गरेका थिए।
पार्टी संस्थापनइतर पक्षका एक पदाधिकारीले भने अध्यक्ष लिङ्देनको कार्यशैलीको विरोध गरे।
‘प्रजातान्त्रिक पार्टीमा फरक विचार राखेकै आधारमा श्रृङ्खलाबद्ध रूपमा नेताहरूमाथि पार्टी नेतृत्वको चाहनामा कारबाही गर्दा नेता कार्यकर्ताहरू आतंकित भएका छन्, यसले अन्तत: पार्टीलाई नै क्षति पुर्याउँछ,’ ती पदाधिकारीले भने।
-1755241369.jpg)
-1746009348.jpg)
