नेपाली कांग्रेसका महामन्त्री गगन थापाले कृषि तथा पशुपन्छी मन्त्री रामनाथ अधिकारीलाई भेटेर आन्दोलित उखु किसानका मागहरूको सन्दर्भमा कुराकानी गरेका छन्।
उखु किसानहरूले केही समयदेखि माइतीघर मण्डलमा धर्ना दिइरहेका छन्। सरकारले प्रतिक्विन्टल ३५ रुपैयाँका दरले उखु किसानलाई भुक्तानी दिन रकम निकासा गरिसकेको बताएको छ।
तर महामन्त्री थापाले प्रतिक्विन्टल ७० रुपैयाँकै दरले भुक्तानी दिन कृषि मन्त्री अधिकारीलाई आग्रह गरेका छन्।
‘अहिले तत्काल गर्नुपर्ने काम भनेको आन्दोलित किसानलाई सरकारले कबुल गरे अनुसारको उनीहरूको बिक्रीमा आधारित प्रोत्साहन अनुदान भुक्तानी नै हो। बजेटको अभावका कुराहरू बाहिर आए पनि अवस्था त्यस्तो छैन। चालु आर्थिक वर्ष ८२/८३ को बजेटमा कृषि तथा पशुपन्छी विकास मन्त्रालय अन्तर्गत 'उखु कृषकहरूलाई अनुदान उपलब्ध गराउने सम्बन्धी कार्यविधि, २०७५ (संशोधन सहित) उखु उत्पादक कृषकलाई प्रोत्साहन अनुदान उपलब्ध गराउने (गत आ.व. २०८१/८२ को समेत)' शीर्षकमा २ अर्ब रुपैयाँ छुटाइएको छ। यसबाट रकम निकासा गरी अविलम्ब प्रोत्साहन अनुदान रकम अन्तर्गत प्रतिक्विन्टलमा पाउने ७० रुपैयाँको दरले भुक्तानी प्रक्रिया अगाडि बढाउनुपर्छ,’ बुधबार कृषि मन्त्रीसँगको भेटमा महामन्त्री थापाले भने।
साथै उनले किसानहरूको हितको सन्दर्भमा सरकारले कहिले एउटा निर्णय गर्ने र कहिले फिर्ता गर्ने गर्न नहुने पनि बताए।
‘किसानहरूलाई पटक-पटक सडकमा आउने अवस्था सिर्जना गर्नु हुँदैन। न्यूनतम मूल्यदेखि अनुदानसम्मलाई व्यवस्थित गर्दै दीर्घकालीन समाधान निकाल्नका लागि विभिन्न सरोकारवालाहरूसँग बसेर बहु-आयामिक ढङ्गले काम गर्नुपर्नेछ,’ उनले भने।
महामन्त्री थापाले प्रधानमन्त्री केपी शर्मा ओलीलाई पनि विनियोजित बजेटबाट उखु किसानले पाउनुपर्ने रकम भुक्तानी गरी किसानलाई सडकबाट घर-खेतमा फर्कने वातावरण बनाउन आग्रह गरेका छन्।
-1746009348.jpg)
