नेकपा (एकीकृत समाजवादी) का अध्यक्ष माधवकुमार नेपालले कम्युनिस्ट आन्दोलनलाई अझ प्रगतिशील, जनमुखी र एकीकृत बनाउनुपर्ने बताएका छन्। पार्टी स्थापनाको पाँचौं वर्ष प्रवेश गरेको सन्दर्भमा शुभकामना दिँदै उनले नेपालको कम्युनिष्ट आन्दोलनमा अनेकौं विकृति र विसंगति विद्यमान रहेको औंल्याएका हुन्।
‘एकीकृत समाजवादी दक्षिणपन्थी नीति, व्यक्तिवाद, अहंकारवाद, स्वेच्छाचारिता, कार्यकर्ताबीचको विभेद र अधिकारको केन्द्रीकरणजस्ता विकृतिविरुद्ध विद्रोह मार्फत गठन भएको हो। यसले स्थापनाकालमै कम्युनिष्ट आन्दोलनभित्र देखिएका विचलनलाई अन्त्य गर्दै आन्दोलनलाई शुद्धिकरण, एकीकरण र सशक्तीकरण गर्ने ऐतिहासिक जिम्मेवारी लिएको छ,’ शुभकामना सन्देशमा भनिएको छ।
एकीकृत समाजवादीले सदैव जनताको पक्षमा अडिग रहँदै समाजवाद उन्मुख लोकतन्त्रलाई मजबुत पार्ने, समतामूलक समाज निर्माण गर्ने र गरिव, किसान तथा उत्पीडित वर्गको अधिकारलाई संस्थागत गर्ने संकल्प बोकेको पनि उनले बताएका छन्।
‘यद्यपि अहिले पनि नेपालको कम्युनिष्ट आन्दोलनमा अनेकौं विकृति र विसंगति विद्यमान छन्, जसका विरुद्ध केवल नेता–कार्यकर्तालाई मात्र होइन, व्यापक जनतालाई समेत सचेत एवम् गोलबन्द गर्दै आन्दोलनलाई अझ प्रगतिशील, जनमुखी र एकीकृत बनाउने दृढ अठोटका साथ समाज रुपान्तरणको बाटोमा अघि बढ्नुपर्ने ऐतिहासिक आवश्यकता रहेको छ,’ सन्देशमा उल्लेख छ।
-1756101193.jpeg)
-1746009348.jpg)
