आमाको नामबाट सन्तानले नागरिक पाउने लगायतका विषय समेटिएको ‘नेपाल नागरिकता (दोस्रो संशोधन) विधेयक शुक्रबार राष्ट्रिय सभाबाट सर्वसम्मत पारित भएको छ।
गृहमन्त्री रमेश लेखकले सभा अन्तर्गतको विधायन समितिको प्रतिवेदनसहित प्रतिनिधि सभाबाट सन्देशसहित प्राप्त नेपाल नागरिकता (दोस्रो संशोधन) विधेयक, २०८१ पारित गर्ने प्रस्ताव पेस गरेका थिए।
गृहमन्त्री लेखकले संसदले विधेयकलाई उन्नत, व्यावहारिक, पारदर्शी बनाएको जानकारी गराए। उनले ऐतिहासिक प्रस्थान गरेको भन्दै यसमा सहयोग गर्ने सबैप्रति आभार प्रकट गरे।
नेपालको नागरिक आमाबाट नेपालमा जन्म भई नेपालमा नै बसोबास गरेको व्यक्तिको बाबु सम्पर्कविहीन भई बाबुको पहिचान हुन नसकेको वा आमाले बाबु यिनै व्यक्ति हुन् भनी पहिचान गराउन नसकेको वा त्यस्तो व्यक्तिको जन्मदर्ता वा शैक्षिक योग्यताको प्रमाणपत्र वा अन्य कुनै प्रमाणमा बाबुको नाम उल्लेख भए पनि बाबुको पहिचान खुलाउन नसकेको व्यक्तिको बाबुको पहिचान हुन नसकेको मानेर वंशजको नागरिकता प्रदान गर्ने व्यवस्था गरिएको छ।
उनले नेपालको नागरिक आमाबाट विदेशमा जन्म भई नेपालमा स्थायी बसोबास गरेको, विदेशको नागरिकता वा राहदानी नलिएको र बाबुको पहिचान नभएको व्यक्तिलाई अंगीकृत नागरिकता प्रदान गर्ने, कुनै व्यक्तिले नागरिकताको प्रमाणपत्रमा आमा वा बाबुमध्ये कुनै एकको नाम, थर र ठेगाना उल्लेख गर्न नचाहेको भनी निवेदन दिएमा त्यस्तो व्यक्तिलाई दिइने नेपाली नागरिकताको प्रमाण पत्रमा उल्लेख गर्न नचाहेको आमा वा बाबुको नाम, थर र ठेगाना उल्लेख नगरी नागरिकता जारी गर्ने विषय समेटिएको बताए।
त्यस्तै, बाबु वा आमामध्ये एक जना नेपाली नागरिक रहेको नाबालकलाई नाबालक परिचयपत्र प्रदान गर्ने विधेयकले व्यवस्था गरेको छ।
बाबु वा आमामध्ये कुनै एकले जन्मको आधारमा नेपाली नागरिकता प्राप्त गरेको र अर्कोको नेपाली नागरिकता प्राप्त गर्नु अगावै मृत्यु भएको वा सम्पर्कविहीन रहेको व्यक्तिलाई अंगीकृत नागरिकता प्रदान गर्ने व्यवस्था गरिएको गृहमन्त्री लेखकले जानकारी दिए।
-1746009348.jpg)
