नेपाली कांग्रेसका सांसद गगन थापाले आफू दुई दलीय संयन्त्रमा अहिले सक्रिय नरहेको बताएका छन्।
कांग्रेस महामन्त्रीसमेत रहेका थापाले प्रतिनिधि सभाको बिहीबारको बैठकमा बोल्दै आफू गत फागुनदेखि नै संयन्त्रमा सक्रिय नरहेको बताएका हुन्।
प्रधानमन्त्री केपी शर्मा ओली र कांग्रेस सभापति शेरबहादुर देउवाको नेतृत्वमा दुई दलका शीर्ष नेताहरू रहेको संयन्त्र बनाइएको थियो। सरकारका कामकाजलाई थप प्रभावकारी बनाउन उक्त संयन्त्रले काम गर्ने भनिएको थियो।
२०८१ कात्तिकमा बनाइएको संयन्त्रमा कांग्रेसबाट उपसभापति पूर्णबहादुर खड्का, महामन्त्री थापा, गृहमन्त्री रमेश लेखक र परराष्ट्र मन्त्री आरजु राणा देउवा थिए।
यस्तै एमालेबाट वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शंकर पोखरेल र उपमहासचिव विष्णु रिमाल थिए।
‘यो सरकारलाई सफल बनाउने सोचाइ छ, मैले एउटा भूमिकामा बसेर काम पनि गरेँ। फागुन महिनासम्म त मैले संयन्त्रमा बसेर काम पनि गरेँ,’ महामन्त्री थापाले भने, ‘म अहिले त्यो जिम्मेवारीमा सक्रिय नरहेता पनि कांग्रेसको सांसद र जिम्मेवार पदाधिकारी छु। त्यसैले यो सरकार सफल बनाउनुपर्छ भन्नेमा म सचेत पनि छु।’
सरकारलाई सफल बनाउने सन्दर्भमा बन्द कोठाभित्र प्रधानमन्त्री र सभापतिलाई सुझावसमेत दिँदै आएको उनले बताए।
उनले संविधान संशोधनलगायत ७ बुँदे सहमति अघि नबढेको बताए।
यो पनि: भारत र चीनलाई भन्नुपर्छ, हाम्रो भूमिमा आँखा लगाउने कुरा स्वीकार्य हुँदैन: गगन थापा (भिडिओ)
-1742801159.jpg)
-1746009348.jpg)
