नेपाली कांग्रेसका सभापति शेरबहादुर देउवाले जनतालाई केन्द्रमा राखेर उपलब्धिकेन्द्रित प्रविधि नीति बनाउने पक्षमा पार्टी रहेको बताएका छन्।
केन्द्रीय सदस्य मीनबहादुर विश्वकर्मा प्रमुख रहेको सूचना, सञ्चार तथा प्रचार विभागले केन्द्रीय कार्यालय सानेपामा बिहीबार गरेको 'डिजिटल प्लेटफर्मको प्रयोग, प्रभाव र असर' विषयक अन्तर्क्रियामा बोल्दै सभापति देउवाले भने अहिले विज्ञान र प्रविधिको युग भएको बताए।
‘आजको युग विज्ञान र प्रविधिको युग हो। हामी अहिलेको युगलाई डिजिटल युग भन्छौं। मोबाइल, इन्टरनेट, कम्प्युटर र सामाजिक सञ्जालको माध्यमबाट हरेक दिन करोडौं मानिसहरू डिजिटल प्लेटफर्महरूमा जोडिएका छन्,’ सभापति देउवाले भने, ‘कांग्रेसले डिजिटल प्लेटफर्मलाई आर्थिक गतिविधि बढाउन, सुशासन कायम गर्न, प्रविधिमा पहुँच पुर्याई विशेष गरी युवा, विद्यार्थी, उद्यमी, किसान, अनुसन्धानकर्ता र समग्र निजी क्षेत्रको सृजनशीलता प्रवद्र्धन गर्न उपयोग गर्ने र जनतालाई केन्द्रमा राखेर उपलब्धिकेन्द्रित प्रविधि नीति बनाउने पक्षमा छौं।’
सूचना प्रविधिले जनतालाई छिटो, सजिलो र पारदर्शी ढंगले सेवा दिन उल्लेखनीय भूमिका खेलिरहेको बताउँदै सभापति देउवाले घर–घरमा इन्टरनेटको पहुँच, मोबाइल बैंकिङ, अनलाइन फाराम, डिजिटल स्वास्थ्य सेवा तथा डिजिटल शिक्षा— यी सबै प्रविधिमैत्री योजनाहरूले जनताको जीवनशैली सरल, समावेशी र सम्मानजनक बनाउँदै लगेको बताए।
‘हाम्रो पार्टी, नेपाली कांग्रेस, सधैं नवप्रवर्तन र प्रविधिमार्फत सामाजिक रूपान्तरणको पक्षमा उभिँदै आएको छ,’ उनले भने।
-1746009348.jpg)
