राष्ट्रिय प्रजातन्त्र पार्टी (राप्रपा) मा अध्यक्ष राजेन्द्र लिङ्देन र उपाध्यक्ष विक्रम पाण्डे तथा महामन्त्री धवल शम्शेर राणा पक्षबीच मतभेद बढ्दा त्यसको असर पार्टीका भ्रातृ संस्थाका अधिवेशनमा पनि देखिएको छ।
अध्यक्ष लिङ्देनले केही मनोनीत पदाधिकारीहरूलाई पदमुक्त गरेको र जिल्ला अधिवेशन गराउन 'एकलौटी' रूपमा प्रतिनिधि तोकेको भन्दै विक्रम-धवलशम्शेर पक्ष असन्तुष्ट छ।
पार्टीमा देखिएको गुटको टकराब विस्तारै भ्रातृ संस्थामा सरेको हो। यही टकराबका कारण बुधबार राष्ट्रिय प्रजातान्त्रिक युवा संगठन काठमाडौंको अधिवेशन नै भाँडियो।
जिल्ला अधिवेशनमा भाग लिने प्रतिनिधि नै सुनिश्चित नभई अधिवेशन उद्घाटन गर्न खोजिएको थियो।
आफ्ना पक्षका मानिसहरूलाई प्रतिनिधि हुन रोकेर एकलौटी ढंगले अधिवेशन गर्न खोजेको भन्दै उपाध्यक्ष विक्रम र महामन्त्री धवल पक्षका युवाहरू आक्रोशित थिए।
अधिवेशन उद्घाटन गर्न प्रमुख अतिथिका रूपमा अध्यक्ष राजेन्द्र लिङ्देनलाई बोलाइएको थियो।
लिङ्देन धुम्बाराहीस्थित अधिवेशनस्थलमा आउनुअघि नै विक्रम-धवल पक्षका ज्योति लामा समूहले मञ्च 'कब्जा' गरेका थिए। यद्यपि अध्यक्ष लिङ्देन आएपछि उनीहरूले मञ्च छाडे तर नाराबाजी गरिरहे।
अध्यक्ष लिङ्देनले ज्योति लामालाई मञ्चनजिकै बोलाएर असन्तुष्टिबारे सोधेका थिए। लामाले आफू पक्षका मानिसहरूलाई प्रतिनिधि आउन छेकिएको र यसरी अधिवेशन नहुने बताएका थिए।
यसपछि पनि अधिवेशन उद्घाटन सत्र अघि बढ्न सकेन। ज्योति लामाले आफ्ना कुरा राख्न पाउनुपर्ने माग गरे। त्यसको केहीबेरमा लिङ्देन पक्ष र विक्रम-धवल पक्षका युवाहरूबीच धकेलाधकेल नै भयो।
अध्यक्ष लिङ्देनले यस्तो परिस्थितिमा अधिवेशन हुन नसक्ने भन्दै स्थगित गरेका थिए। हुलदंगा गर्नेहरूमाथि छानबिन गर्ने र त्यसपछि मात्रै अधिवेशन गर्ने लिङ्देनको भनाइ थियो।
प्रमुख अतिथिका रूपमा पुगेका लिङ्देनले अधिवेशन नै स्थगित भएको घोषणा गरेपछि विक्रम-धवल पक्षका युवाहरूले ज्योति लामालाई राष्ट्रिय प्रजातान्त्रिक युवा संगठन अध्यक्ष घोषणा गरे, अबिर लगाइदिए।
राष्ट्रिय प्रजातान्त्रिक युवा संगठन काठमाडौं अध्यक्षमा लिङ्देन पक्षबाट अहिलेका अध्यक्ष अमित ठकुरी नै दोहोरिन चाहेका थिए भने संस्थापनइतर समूह (विक्रम-धवल) पक्षबाट ज्योति लामा उम्मेदवार हुन लागेका थिए।
राप्रपाले राप्रयुसंघको काठमाडौं क्षेत्र नम्बर २ र ६ को विवाद समाधान नगरी काठमाडौं जिल्ला अधिवेशन गर्न खोजेको थियो। राप्रपाका एक पदाधिकारीका अनुसार क्षेत्र नम्बर २ र ६ मा पहिलेदेखि नै राप्रयुसंघमा समानान्तर समिति छ।
कुन समितिलाई वैधानिकता दिने भन्ने विषय हल नगरी जिल्ला अधिवेशन गर्न खोज्दा तनावको स्थिति बनेको हो। अधिवेशनमा भाग लिने प्रतिनिधिको नामावलीसमेत निर्वाचन समितिलाई दिइएको थिएन।
सर्वपक्षीय बैठक गरेर पहिले प्रतिनिधि टुंगो लगाउने र त्यसपछि मतदाता नामावली सार्वजनिक गरेर मात्रै अधिवेशन अघि बढाउने भने पनि त्यसअनुसार प्रक्रिया अघि नबढाइ अध्यक्ष लिङ्देन पक्षले सिधै जिल्ला अधिवेशन उद्घाटन गर्न खोजेको थियो।
त्यसपछि विक्रम-धवल पक्षका युवाहरूले अधिवेशन रोकेका हुन्।
अधिवेशन भाँड्न पार्टीभन्दा बाहिरी मानिस पनि आएको अध्यक्ष लिङ्देनको आशंका छ।
‘यो गुटभन्दा पनि पार्टीमा अनुशासनको विषय हुन्छ। यी युवाहरू राप्रपाका हुन् कि होइनन् छानबिन हुन्छ। बाहिरका मानिस आएका छन् यो अधिवेशन भाँड्न भन्ने पनि छ,’ अध्यक्ष लिङ्देनले भने।
अध्यक्ष लिङ्देन पक्षले उपाध्यक्ष विक्रम पाण्डेनिकट केही युवाहरू अधिवेशन भाँड्न आएको आरोप लगाएको छ। ती युवा पहिले पनि राप्रपा नेता ठाकुरमोहन श्रेष्ठमाथि कुटपिटमा परिचालन भएको दाबी लिङ्देन पक्षको छ।
‘काठमाडौं ४ का क्षेत्रीय अध्यक्ष रिद्धिप्रताप राणालगायत युवा आज अधिवेशन भाँड्न आएको देखियो, उपाध्यक्ष विक्रम पाण्डेको निर्देशनमा नेता ठाकुरमोहन श्रेष्ठमाथि कुटपिटमा संलग्न रहेको पाइएपछि अनुशासन समितिले रिद्धिप्रतापलाई चार वर्षका लागि निलम्बन गरेको थियो,’ अध्यक्ष लिङ्देननिकट एक नेताले भने।
तर विक्रम-धवल पक्षले भने अध्यक्ष लिङ्देन पक्षले परिचालन गरेका युवाहरूले रिद्धिप्रताप राणामाथि बुधबार कुटपिट गरेको बताएका छन्।
‘राष्ट्रिय प्रजातान्त्रिक युवा संगठन काठमाडौं जिल्ला अधिवेशनमा अध्यक्ष लिङ्देनले परिचालन गरेका गुण्डाहरूले राप्रपा क्षेत्र नम्बर ४ का क्षेत्रीय अध्यक्ष एवं निवर्तमान राष्ट्रिय प्रजातान्त्रिक युवा संगठन काठमाडौंका अध्यक्ष रिद्धिप्रताप राणामाथि हेलमेट प्रहार गरेर घाइते बनाए,’ विक्रम-धवल पक्षका एक नेताले भने।
हेल्मेट प्रहारबाट घाइते राणा।
अधिवेशन किन स्थगित भएको हो भनेर हामीले निर्वाचन समिति संयोजक जयन्तनाथ खनाललाई सोधेका छौं।
उनले विवाद भएपछि अध्यक्ष लिङ्देनले नै अधिवेशन स्थगित गरिदिएको बताए।
‘अधिवेशन स्थगित भयो भनेर अध्यक्षज्यूले नै घोषणा गर्नुभएको छ, अधिवेशन उद्घाटन सत्र सुरू गर्न खोज्दा अध्यक्षलाई नै बोल्न नदिनेजस्तो स्थिति देखा पर्यो,’ उनले सेतोपाटीसँग भने, ‘जिल्ला अधिवेशनका लागि मतदाता नामावली र निर्वाचन कार्यतालिका नै प्रकाशित भएको पनि थिएन।’
उनले केही क्षेत्रमा विवाद देखिएकोले सर्वपक्षीय बैठक गरेर प्रतिनिधि टुंग्याउने र त्यसपछि मात्रै मतदाता नामावली प्रकाशन गर्ने सहमति बने पनि त्यसअनुसार प्रक्रिया अघि बढ्न नसकेको बताए।
‘हामीलाई जिल्ला समितिले मतदाता नामावली नै हस्तान्तरण गरेको थिएन,’ उनले भने। जिल्ला अधिवेशनमा काठमाडौंका १० क्षेत्रबाट, महानगर कमिटीबाट र प्रदेश सभा क्षेत्रीय समितिबाट प्रतिनिधि सहभागी हुन पाउँछन्।
राप्रपाको २०७८ मंसिरमा भएको महाधिवेशनमा विक्रम पाण्डे उपाध्यक्ष र धवल शम्शेर राणा महामन्त्रीमा निर्वाचित भएका थिए। आगामी महाधिवेशनको मिति नतोकिए पनि महाधिवेशन तयारीस्वरूप राप्रपाभित्र गतिविधि भइरहेका छन्।
राप्रपाको आगामी महाधिवेशनमा पनि लिङ्देन पुन: अध्यक्षमा उठ्ने तयारीमा छन् भने विक्रम पाण्डे र धवल शम्शेर राणा पनि अध्यक्षका लागि तयारी गरिरहेका छन्। महाधिवेशनकेन्द्रित गुट लडाइँले राप्रपाभित्र पछिल्लो समय मतभेद निम्त्याएको हो।
-1755084274.jpeg)
-1746009348.jpg)
