बंगलादेशका अन्तरिम सरकार प्रमुख मोहम्मद युनुसले आगामी फेब्रुअरीमा आम निर्वाचन गर्ने घोषणा गरेका छन्।
विद्यार्थी आन्दोलनपछि सत्ता परिवर्तन भएको एक वर्ष पुगेको अवसरमा आयोजित 'दोस्रो मुक्ति' उत्सवको अन्त्यमा सम्बोधन गर्ने क्रममा युनुसले उक्त घोषणा गरेका हुन्।
उनले आगामी फेब्रुअरीमा रमजानअघि नै निर्वाचन गरिसक्नेसमेत बताएको बिबिसीले जनाएको छ।
युनुसले यसअघि सन् २०२६ को जुनमा आम निर्वाचन गर्ने प्रस्ताव गरेका थिए। तर अब रमजानअघै नै निर्वाचन गराउने तयारी गरेका हुन्।
मंगलबार बंगलादेश नेशनलिस्ट पार्टी (बिएनपी), जमात-ए-इस्लामी र विद्यार्थीहरूले स्थापना गरेको नेशनल सिटिजन पार्टी (एनसिपी) का प्रतिनिधिहरू पनि उपस्थित रहेका समारोहमा फेब्रुअरीमै चुनाव गर्ने घोषणा गरेका हुन्।
'धेरै वर्षदेखि हामीले मत दिन पाएका छैनौं। यसपटक सबैले मत हाल्न पाउनेछन्। कसैलाई पनि छुटाइने छैन,' चुनाव घोषणा गर्दै उनले भने।
फेब्रअरीमा भने पनि तारिख भने तय भइसकेको छैन।
युनुसले त्यसै दिन युनुसले ‘जुलाई घोषणा’ पनि पढेर सुनाएका थिए।
जसमा आन्दोलनमा ज्यान गुमाएकाहरुलाई ‘राष्ट्रिय नायक’ को मान्यता दिने र संविधानमै छात्र आन्दोलनको योगदान उल्लेख गर्ने प्रतिवद्धता जनाएका छन्।
घोषणामा बंगलादेशलाई नैतिकता, कानुनी शासन र लोकतान्त्रिक मूल्यमा आधारित देश बनाउने वाचा गरिएको छ। साथै, हसिनाको शासनकालमा हिंसामा संलग्न भएकाहरूमाथि न्यायिक कारबाहीको प्रक्रियाको प्रतिवद्धता जनाइएको बिबिसीले जनाएको छ।
अघिल्लो वर्षको जुलाइ र अगस्ट महिनामा विद्यार्थीहरूको आन्दोलन पछि प्रधानमन्त्री शेख हसिना देश छाडेर भारत भागेकी थिइन्। उनी अहिले पनि भारतमा निर्वासित छन्।
उनले अगस्ट ५ मा भारततर्फ भागेकी थिइन्। नागरिक सेवाको जागिरको कोटाविरुद्ध सुरु भएको छात्र आन्दोलन सरकारविरुद्धको विद्रोहमा परिणत भएपछि हसिनाको १५ वर्षे सत्ताको अन्त्य भएको थियो।
त्यसपछिका दिनमा नोबेल पुरस्कार विजेता मुहम्मद युनुसले नेतृत्वमा अन्तरिम सरकार गठन गरिएको थियो।
उनले सोमबार बंगलादेशी जनताका नाम खुला पत्र लेख्दै आफूले कहिल्यै पद त्याग नगरेको र २०२४ को घटनालाई ‘कू’ भएको दाबी गरेकी छन्। उनले लेखेकी छन्, 'म तपाईंहरूमाथि विश्वास गर्छु। म बंगलादेशमाथि विश्वास गर्छु। र म विश्वास गर्छु कि हाम्रा उत्कृष्ट दिनहरू अझै आउन बाँकी छन्।'
तर हसिनाविरूद्ध बंगलादेशमा मानवअधिकार उल्लङ्घन तथा आन्दोलनमा सयौंको मृत्युका आरोपमा मानवताविरुद्धको अपराध अन्तर्गत मुद्दा चलिरहेको छ।
उनीविरूद्ध पक्राउ पुर्जी समेत जारी भएको छ। रेड कर्नर नोटिस जारी गर्न बंगलादेशको प्रहरीले इन्टरपोलमा निवेदन पनि दिएको थियो।
उनको पार्टी आवामी लिगलाई पनि बंगलादेशमा प्रतिबन्ध लगाइएको छ। त्यसका धेरै नेताहरू र समर्थकहरूलाई जेलमा राखिएको छ।
-1746009348.jpg)
