बालिकाहरूलाई वेश्यावृत्तिमा संलग्न गराएको भन्दै जेल सजाय भोगेका जेफ्री एपस्टिनसँग जोडिएको घटनामा अमेरिकी संसदको शक्तिशाली समितिले पूर्वराष्ट्रपति बिल क्लिन्टनसहित ११ जना पूर्व उच्च पदस्थहरूलाई बयानका लागि बोलाएको छ।
अमेरिकी संसदको 'हाउस ओभरसाइट कमिटी'ले पूर्वराष्ट्रपति क्लिन्टन, उनकी श्रीमतीसमेत रहेकी पूर्वविदेशमन्त्री हिलारी क्लिन्टनसहित त्यतिबेलाका ११ जना उच्च पदस्थहरूलाई बयानका लागि बोलाएको अमेरिकी मिडिया सिएनएनले जनाएको छ।
हिलारी क्लिन्टन ४७ औं राष्ट्रपतिका लागि डेमोक्र्याटिक पार्टीबाट डोनाल्ड ट्रम्पसँग चुनाव लडेर पराजित भएकी थिइन्।
हाउस ओभरसाइट कमिटीले पत्र पठाएकाहरू क्लिन्टन दम्पतीसहित ६ जना पूर्व कानुनमन्त्री, दुई जना एफबिआइका पूर्व निर्देशक छन्। अहिले जेलमा रहेकी एपस्टिनकी प्रेमिका गलिन म्याक्सवेललाई पनि कमिटीले बयानका लागि बोलाएको सिएनएनले जनाएको छ।
बयानका लागि बोलाइएका पूर्व कानुनमन्त्रीहरू मेरिक गारल्याण्ड, विलियम बार, जेफ सेशन्स, लोरेटा लिंच, एरिक होल्डर, अलबर्टो गन्जालेज छन्।
त्यस्तै एफबिआईका पूर्व निर्देशकहरूमा जेम्स कोमी र रोबर्ट मुलर छन्।
बिल क्लिन्टनलाई एप्स्टिनसँगको सम्बन्धका कारण बोलाइएको हो। उनीहरूबीचको सम्पर्क केही कानुनी कागजातहरूमा देखिएको छ।
हिलारी क्लिन्टनलाई बोलाउनुको कारण भने गिलेन म्याक्सवेलको भतिजालाई उनले २००८ को आफ्नो चुनाव अभियानमा जागिर दिएको भन्ने आरोप छ।
कमिटीले न्याय विभागलाई पत्राचार गरेर पीडितहरूको नाम गोप्य राख्ने सर्तमा एपस्टिनसम्बन्धी सबै फाइल बुझाउन पनि भनेको छ।
साथै, बाइडेन प्रशासनका पूर्व अधिकारीहरू र न्याय विभागबीच भएको कुनै पनि कुराकानी पनि पेस गर्न भनिएको सिएनएनले जनाएको छ।
म्याक्सवेलको हकमा सर्वोच्च अदालतमा उनले आफूलाई दोषी ठहर गरिएको सजायविरुद्ध अपिल गरेकाले हाललाई उनको बयान सारिएको छ। म्याक्सवेललाई सन् २०२२ मा २० वर्ष जेल सजाय सुनाइएको थियो।
यस विषयमा संसदभित्र राजनीतिक विवाद पनि देखिएको छ। केही रिपब्लिकन सांसदहरू तत्काल फाइल सार्वजनिक गर्न माग गरिरहेका छन्। तर संसदका सभामुख माइक जोनसनले भने यो विषयमा निर्णय गर्न हतार गर्नु नहुने बताउँदै आएका छन्। उनले ट्रम्प प्रशासनलाई अघि बढ्न समय दिनुपर्ने बताएका छन्।
तर संसदको ओभरसाइट कमिटीका अध्यक्ष जेम्स कोमरले भने ११ जनालाई बोलाएर अनुसन्धान अघि बढाउने निर्णय गरिसकेका छन्। उनले एप्स्टिन र म्याक्सवेलमाथि भइरहेको सरकारी अनुसन्धानमाथि संसदले पनि निगरानी गर्नु जरुरी रहेको बताएका छन्।
एप्स्टिनमाथि वर्षौंदेखि किशोरीहरूलाई यौन शोषण गर्ने आरोप लागेको थियो। सन् २०१९ मा जेलमै उनको मृत्यु भएको थियो।
उनीसँग मिलेर शोषणको काममा संलग्न म्याक्सवेललाई अदालतले दोषी ठहर गरेको थियो।
अहिले संसदले सो घटनामा संलग्न वा जानकारी भएका उच्चपदस्थ नेताहरूले कसरी काम गरे भन्नेबारे विस्तृत छानबिन गरिरहेको छ।
एपस्टिनको ५० औं जन्मदिनका अवसरमा अहिलेका राष्ट्रपति डोनाल्ड ट्रम्प र पूर्वराष्ट्रपति बिल क्लिन्टनले पत्र लेखेको समाचार वाल स्ट्रिट जर्नलले सार्वजनिक गरेपछि एपस्टिन प्रकरण पुनः चर्चामा आएको हो।
ट्रम्पले आफू राष्ट्रपति भएपछि एपस्टिन प्रकरणको फाइल सार्वजनिक गर्ने घोषणा गरेका थिए। यद्यपि उक्त फाइल सार्वजनिक गरिएको छैन।
फाइलमा उनको नाम पनि समावेश भएको समाचार अन्तर्राष्ट्रिय सञ्चारमाध्यमहरूले यसअघि नै सार्वजनिक गरेका थिए। उनको नाम के सन्दर्भमा समावेश भएको भन्ने चाहिँ खुलिसकेको छैन।
एपस्टिन प्रकरणपछि पार्टी भित्र र बाहिरबाट ट्रम्पले चर्को आलोचना खेपिरहेका छन्।
यो पनिः
बालिकाहरूलाई वेश्यावृत्तिमा लगाउने एपस्टिनको ५० औं जन्मदिनमा बिल क्लिन्टनले पनि लेखेका थिए पत्र
एपस्टिन फाइलमा ट्रम्पको पनि नाम रहेको खुलासा
बालिकाहरूलाई वेश्यावृत्तिमा लगाउने जेफ्री एपस्टिनसँगको सम्बन्धले ट्रम्प अप्ठ्यारोमा
-1746009348.jpg)
