उपप्रधानमन्त्री एवम् सहरी विकास मन्त्री प्रकाशमान सिंहले पार्टीका नेता कार्यकर्ताहरूले आफूलाई सभापतिका रूपमा हेर्न चाहेको बताएका छन्।
राष्ट्रिय समाचार समिति (रासस)सँगको कुराकानीमा सिंहले नेता कार्यकर्ताहरूसँगको भेटमा उनीहरूले आफूलाई सभापति बनेको हेर्ने चाहना व्यक्त गरेको बताएका छन्।
'अहिले पार्टीका साथीहरुसँग छलफलमा छु। प्राप्त जिम्मेवारीलाई सधैँ इमानदारीपूर्वक निर्वाह गरेको छु। जिल्ला जाँदा र पार्टीका साथीहरू भेट्दा तपाईंलाई सभापतिका रूपमा हेर्न चाहेका छौँ भनिरहनुभएको छ,' उनले भने।
सिंहले पार्टीभित्र सभापति र सरकारमा प्रधानमन्त्रीबाहेक अरू सबै जिम्मेवारीमा रहेर काम गरिसकेकाले सभापतिको दाबी स्वाभाविक रहेको बताए।
'नेपाली कांग्रेस पार्टीमा सामान्य कार्यकर्ता हुँदै तलैदेखि काम गरेर आएको हुँ। काठमाडौं जिल्ला सभापति, केन्द्रीय सदस्य, निर्वाचित महामन्त्री भएँ। उपसभापति भएँ। सभापतिमा पनि प्रतिस्पर्धा गरिसकेँ। पार्टीमा सभापति र सरकारमा प्रधानमन्त्री बाहेक अरु जिम्मेवारीमा रहेर काम गरिसकेको छु। अब मेरो दाबेदारी पार्टीभित्र कुन पदमा रहला ? तपाईं आफैँ अनुमान गर्न सक्नुहुन्छ,' उनले भने।
यद्यपि कुनै पद पाउनका लागि आफू राजनीतिमा नलागेको पनि उनले बताए।
आफूले राजनीति सुरू गर्दा मुलुकमा त्यसका लागि प्रतिकूल वातावरण रहेको बताउँदै सिंहले दुःखकष्ट भोग्न मात्र नभई ज्यानै जान सक्छ भन्ने बुझेर अप्ठ्यारो अवस्थामा पनि राजनीतिमा लागेको बताए।
'जनतालाई अधिकारसम्पन्न बनाउन र देशमा तानाशाही व्यवस्था अन्त्य गर्न राजनीतिमा आएका हौँ। जतिबेला राजनीतिमा हामी सक्रिय भयौँ, निक्कै असहज अवस्था थियो। सार्वजनिक रूपका कार्यक्रम गर्न पाइँदैनथ्यो। धरपकड, गिरफ्तारी हुन्थ्यो। पार्टी प्रतिबन्धित थियो। ती दिनहरू सजिला थिएनन्। राजाले सत्ता लिएपछि त अवस्था असहज बन्यो। जब जब प्रजातन्त्रमाथि प्रहार भएको छ जनताका अधिकार खोसिएका छन् त्यतिबेला सधैँ चुनौतीपूर्ण मोड आए पनि हामीले त्यसलाई पार गर्न सफल भएका छौँ। राजनीतिमा चुनौती हरक्षण आइरहन्छन्,' उनले भने।
उनले अहिले संसदमा उठिरहेको विषयलाई लिएर सबै दलहरू गम्भीर हुनुपर्ने पनि बताएका छन्।
'संसद्को मर्यादा र गरिमा जोगाउने र जनताको संसद्प्रतिको भरोसा बढाउने, संसद्लाई प्रभावकारी बनाउने दायित्व संसद्मा रहेका सबै दलहरूको हो,' उनले भने।
-1746009348.jpg)
