गृह मन्त्रालयले अध्यागन कार्यालय त्रिभुवन अन्तर्राष्ट्रिय विमानस्थलका प्रमुख अध्यागमन अधिकृत विष्णुप्रसाद कोइरालालाई ५४ दिनमै सरूवा गरेको छ।
निजामती कर्मचारीलाई सामान्यतया एक वर्ष तोकिएको ठाउँमा जिम्मेवारी दिने गरिन्छ।
तर गृह मन्त्रालयले अध्यागन कार्यालय त्रिभुवन अन्तर्राष्ट्रिय विमानस्थलका प्रमुख भने वर्ष दिनमै पटक-पटक परिवर्तन गर्ने गरेको छ। यससँगै पछिल्लो १० वर्षमा २५ जना प्रमुख फेरिएका छन्।
कोइरालालाई मंगलबार सरूवा गरी अध्यागमन कार्यालयबाट गृह मन्त्रालयमा ल्याइएको हो। उनलाई गृहमा कुन जिम्मेवारी दिइएको छ भन्नेबारे खुलिसकेको छैन।
यति छिटो कोइरालाको सरूवा भएपछि यहाँका कर्मचारीहरू चकित छन्।
भिजिट भिसा प्रकरण बाहिरिएपछि अख्तियार दुरूपयोग अनुसन्धान आयोगले तत्कालीन प्रमुख अध्यागमन अधिकृत तीर्थराज भट्टराईलाई जेठ ७ गते कार्यालयबाटै नियन्त्रणमा लिएको थियो।
उनीमाथि अख्तियारले अनुसन्धान गरिरहेको थाहा पाएको गृहले अघिल्लो दिन नै उनको सरूवा गरेको थियो।
भट्टराईको ठाउँमा पाँचथरका प्रमुख जिल्ला अधिकारी भएर कार्यरत कोइरालालाई प्रमुख अध्यागमन अधिकृत बनाइएको थियो। कोइराला जेठ ९ गते कार्यालयमा हाजिर भएका थिए। तर दुई महिना नपुग्दै उनको सरूवा गरिएको हो।
सोमबार कोइरालाले कर्मचारीहरूलाई जबाफदेही बनाउनका लागि एकीकृत जबाफदेही सूची तयार पारेका थिए।
भिजिट भिसा प्रकरणले विवादित भइरहेको बेलामा अध्यागमन कार्यालयले कर्मचारीहरूलाई जबाफदेही बनाउनका लागि भनेर एकीकृत जबाफदेहिता म्याट्रिक्स लागु गरेका थिए। तर उक्त लागु भएको भोलिपल्टै गृहबाट उनको सरूवा सूची निस्किएको हो।
उनले हस्ताक्षर गरेको म्याट्रिक्समा अध्यागमनका क्रममा केही समस्या भए प्रथम जिम्मेवार को हुने, अन्तिम जिम्मेवार को हुने र कार्यालयले के कारबाही गर्ने समेत उल्लेख गरिएको थियो।
अर्थात त्यस सूचीलाई तीन भागमा विभाजन गरिएको थियो।
नेपाली नागरिकको प्रस्थानमा केही समस्या भएमा को जिम्मेवार र के कारबाही हुने, विदेशी नागरिकको आगमन तथा बसाइ सम्बन्धमा केही समस्या भएमा को जिम्मेवार र के कारबाही हुने र प्रक्रियागत त्रुटि गरे के कारबाही गर्ने भन्ने सबै उल्लेख गरिएको थियो।
आवश्यक कागजात पूरा नभएका यात्रुले प्रस्थान अनुमति पाएर फिर्ता भएमा सम्बन्धित अध्यागमन अधिकृत प्रथम जिम्मेवार, वरिष्ठ अध्यागमन अधिकृत अन्तिम जिम्मेवार र कारबाही स्वरूप छानबिन गरी सोको आधारमा आवश्यक कारबाही प्रक्रिया अगाडि बढाउने उल्लेख भएका थिए।
तर उनले सोमबार लागु गरेपछि सेतोपाटीसँग कुराकानी गर्दै भनेका थिए, ‘मान्छे भएपछि गल्ती हुन्छ, जानेर वा नजानेर पनि गल्ती हुन्छन्। तर जनताका समस्या पहिल्यै पहिचान भए भने दुःख पाउँदैनन्। समस्याहरू आइरहेका छन्, त्यो कम गर्न र अधिकृतहरूलाई जिम्मेवार बनाउन यो फ्रेमवर्क लागू गरिएको हो।’
यस्तै यो फ्रेमवर्क कार्यान्वयन गर्नमा कर्मचारीहरूको पनि पूर्ण समर्थन रहने बताएका थिए।
'यो कार्यान्वयनका लागि कर्मचारी साथीहरूबाट शत प्रतिशत समर्थन हुन्छ। बैठक गरेर यो दिइसकिएको छ। कसैबाट बाधा छैन। बरू सुझाव प्राप्त भएको छ,' उनले भनेका थिए, 'सुधारका लागि सबै खुसी नै हुनुहुन्छ भन्ने मेरो विश्वास छ।'
उनीसहित अन्य चार जना अधिकृतहरूको पनि गृहले सरूवा गरेको छ। मन्त्रालयले अध्यागमन विभागका प्रमुखको पनि सरूवा गरेको छ।
अध्यागमन विभाग कालिकास्थानमा सहसचिव रामचन्द्र तिवारीलाई महानिर्देशकको रूपमा पठाएको छ। उनी यसअघि गृहका प्रवक्ता थिए।
अध्यागमन विभागका महानिर्देशक रहेका गोविन्दप्रसाद रिजाललाई गृहले मन्त्रालयमा सरूवा गरेको हो। उनी कात्तिक ९ गते महानिर्देशक भएका थिए।
उनको सट्टामा प्रमुख अध्यागमन अधिकृतको रूपमा जिल्ला प्रशासन कार्यालय खोटाङमा कार्यरत नरहरि घिमिरेको सरूवा भएको छ। घिमिरेको ठाउँमा खोटाङको प्रमुख जिल्ला अधिकारीमा सहसचिव कल्पना श्रेष्ठलाई पठाइएको छ।
अध्यागमन विभागमै पनि १० वर्षमा १४ जना प्रमुख फेरिएका छन्।
यो पनि पढ्नुस्: नेताज्यूहरू, विमानस्थल अध्यागमनमा १० वर्षमा किन फेरिए २४ जना प्रमुख?
विमानस्थलको अध्यागमनले लागू गर्यो नयाँ जबाफदेहिता सूची, कुन समस्यामा को जिम्मेवार? (सूचीसहित)
-copy-1745411477.jpg)
-1746009348.jpg)
