अमेरिकी राष्ट्रपति डोनाल्ड ट्रम्पले क्यानडालाई ३५ प्रतिशत भन्सार लगाउने घोषणा गरेका छन्।
ट्रम्पले बुधबार क्यानडाका प्रधानमन्त्री मार्क कार्नीलाई पत्र पठाएर उसको सामान अमेरिका आयात गर्दा ३५ प्रतिशत भन्सार लगाइने जानकारी गराएका हुन्।
ट्रम्पले यसअघि लगाएको २५ प्रतिशतबाट भन्सार दर बढाएर ३५ प्रतिशत पुर्याएका हुन्।
उनले क्यानडाबाट अवैध रूपमा अमेरिका भित्रिने लागुऔषध फेन्टानिल रोक्न नसकेको आरोप लगाएर भन्सार दर ३५ प्रतिशत पुर्याएको घोषणा गरेका हुन्।
क्यानडाले भने यस्तो ठूलो मात्रामा फेन्टानिल निर्यात नगरेको दाबी गर्दै ट्रम्पको आरोप अस्वीकार गरेको छ।
ट्रम्पले उक्त योजना अगस्ट १ देखि लागु हुने बताएका छन्।
उनले क्यानडाले प्रतिरोध गरे भन्सार दर क्रमशः बढाउँदै लगिने चेतावनी पनि दिएका छन्।
' २०२५ को अगस्ट २५ देखि हामी क्यानडाबाट संयुक्त राज्य अमेरिका पठाइने वस्तुहरूमा ३५ प्रतिशत भन्सार लगाउँछौं। जबाफमा यदि तपाईं पनि भन्सार दरहरू बढाउने निर्णय गर्नुहुन्छ भने, तपाईंले जति प्रतिशत बढाउनुहुन्छ, त्यो सबै हामीले लगाएको ३५ प्रतिशतमा थपिनेछ,' ट्रम्पले लेखेको पत्रमा भनिएको छ।
ट्रम्पले क्यानडाले अवैध पैठारी रोक्न नसक्दा अमेरिका फेन्टानिल संकटसँग जुध्न परिरहेको बताए। त्यसका बाबजुद पनि अमेरिका क्यानडासँग सहकार्य गर्न तयार रहे पनि क्यानडाले अमेरिकासँग आर्थिक रूपमा बदला लिएको भनेका छन्।
उनले क्यानडाभित्रका कम्पनीले अमेरिकाभित्र उत्पादन र निर्माण कार्य गरे ती वस्तुहरूमा उच्च भन्सार नलाग्ने पनि ट्रम्पले बताएका छन्।
इच्छुक कम्पनीहरूलाई अमेरिकाभित्रै उत्पादन गर्ने अनुमति प्रदानको प्रक्रिया पनि छिटो गरिने ट्रम्पले बताएका छन्।
ट्रम्पले अन्य व्यापारिक साझेदार मुलुकहरूलाई १५ देखि २५ प्रतिशत भन्सार लगाउने बताएका छन्।
ट्रम्पले यसअघि क्यानडासहित विभिन्न देशहरूलाई पारस्परिक भन्सार लगाएका थिए।
ट्रम्पले 'स्वतन्त्रता दिवस' भन्दै अप्रिल २ मा आफ्ना सबै व्यापारिक साझेदारलाई १० प्रतिशत र मुख्य प्रतिस्पर्धी देशहरूलाई उच्च 'रेसिप्रोकल' (पारस्परिक) भन्सार लगाउने घोषणा गरेका थिए। उनले जबाफी कदम चाले अझ उच्च भन्सार लगाउने र नचाले पुरस्कृत गर्ने धम्की पनि दिएका थिए। चीनबाहेक कसैले पनि अमेरिकाविरूद्ध जबाफी कदम चालेनन्।
यद्यपि, यही कारणले अमेरिकी अर्थतन्त्र नै धराशायी हुने खतरा भएपछि ट्रम्पले एक सातामै ७० वटाभन्दा बढी देशलाई लगाएको उच्च पारस्परिक दर ९० दिनका लागि फिर्ता लिएका थिए। त्यसपछि उनले सबैलाई १० प्रतिशत भन्सार लगाएका थिए।
उनले दिएको ९० दिनको समय यही महिना सकिँदैछ। अमेरिकासँग व्यापार सम्झौता गर्न क्यानडासहितका देशहरूले वार्ता गरिरहेका छन्।
क्यानडाका प्रधानमन्त्री मार्क कार्नीले अमेरिकासँगको वार्तामा क्यानाडेली कामदार र व्यवसायहरूको सुरक्षा हुनेगरी अमेरिकासँग वार्ता गर्ने बताएका छन्।
कार्नीले गत महिना अमेरिकासँग तीस दिनभित्र नयाँ व्यापार सम्झौता गर्ने बताएका थिए।
अहिले क्यानडालाई पठाएको पत्रबारे ट्रम्पले फेन्टानिलको ओसारपसार रोके भन्सार घटाउन सक्ने बताएका छन्।
'त्यसलाई रोक्न क्यानडा सफल भए ऊमाथि लगाइएको भन्सार घटाउन सकिन्छ,' ट्रम्पले भनेका छन्।
ट्रम्पसँग नझुक्ने नारामा कार्नीले नयाँ कार्यकाल जितेका थिए।
ट्रम्पसँग व्यापार युद्ध चलिरहेको बेलामा कार्नीले मार्च महिनामा प्रधानमन्त्रीको रूपमा शपथ लिएका थिए। अमेरिकासँग त्यतिबेला चर्किरहेको व्यापार युद्धले आफ्नो दललाई फाइदा हुने भएकाले शपथ लिएको एक सातामै उनले संसद विघटन गरेर चुनावको घोषणा गरेका थिए।
ट्रम्पले दोस्रो कार्यकाल सुरू नगरिकनै आफ्नो लोकप्रियता व्यापक खस्किएपछि जनवरीमा तत्कालीन प्रधानमन्त्री जस्टिन ट्रुडोले लिबरल पार्टी नेताबाट राजीनामा दिएका थिए। उनले राजीनामा दिएपछि पनि आम-निर्वाचनमा हार्ने लगभग निश्चित भइसकेको उनको लिबरल पार्टीले ट्रम्पकै कारण क्यानडामा निर्वाचन जितेको हो।
गत नोभेम्बरमा राष्ट्रपतीय निर्वाचन जितेदेखि ट्रम्पले क्यानडाबाट आउने सबै सामानमा २५ प्रतिशत भन्सार लगाउने र क्यानडालाई अमेरिकाको ५१ औँ राज्य बनाउने भनिरहेका छन्। विपक्षी कन्जरभेटिभ पार्टीका दक्षिणपन्थी नेता पियर पलिएभलाई ट्रम्पजस्तै भनेर तुलना गरेर चुनाव प्रचार गरेपछि लिबरल पार्टीको भाग्य चम्किएको थियो।
ट्रम्पसँग निकट रहेका 'टेस्ला' कम्पनीका मालिक इलन मस्क, पडकास्टर जो रोगन लगायत ट्रम्प समर्थक अमेरिकीले पनि पलिएभको तारिफ गर्थे। ट्रम्पले क्यानडाका जनतालाई चिढ्याउनुअघिसम्म पलिएभले चुनाव प्रचार गर्दा पनि ट्रम्पकै शैली अपनाएका थिए। पहिलो पटक राष्ट्रपति चुनाव लडेको बेला ट्रम्पले 'अमेरिका बर्बाद भएको छ' भन्ने नारा दिएजस्तै पलिएभ पनि 'क्यानडा बर्बाद भएको छ' भनेर नारा लगाउँथे।
तर, ट्रम्प कार्यकालको एक महिनामै पलिएभका लागि ट्रम्पको समर्थन र उनीसँगको समानता घाँडो भएको थियो। उनले आफ्नो प्रचार शैली फेरेर 'क्यानडा फर्स्ट' को नारा लगाए पनि क्यानडेली जनताले उनको दलभन्दा लिबरल पार्टीले ट्रम्पको सामना बलियोसँग गर्नेछ भनेर लिबरललाई चुनाव जिताएका थिए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1742813129.jpg)
-1746009348.jpg)
