नेकपा (एमाले) का महासचिव शंकर पोखरेलले पार्टीको १० औं राष्ट्रिय महाधिवेशनमा प्रतिनिधि भएर पारित गरेको विधानमा प्रश्न उठाएको भन्दै त्यस्तो संगठनात्मक अराजकता प्रदर्शन नगर्न चेतावनी दिएका छन्।
एमालेभित्र पहिलो विधान महाधिवेशनले पारित गरेको कार्यकालको प्रावधान हटाइएको विषय बहसमा छ। स्थायी कमिटी सदस्य कर्ण थापाले सार्वजनिक रूपमै विधानमा छलफल भएको टिप्पणी गरेका छन्।
बिहीबार पार्टी जनसंगठनहरू पदाधिकारी र इन्चार्जहरूको भेलामा बोल्दै महासचिव पोखरेलले विधान महाधिवेशनले तय गरेका कतिपय विषयहरु राष्ट्रिय महाधिवेशनले संशोधन गर्न सक्ने बताएका हुन्। एमालेको दसौं महाधिवेशन २०७८ मंसिरमा चितवनमा भएको थियो।
‘विधान महाधिवेशनले अन्तिम रूप दिएका कतिपय प्रावधान तत्कालीन आवश्यकताका आधारमा राष्ट्रिय महाधिवेशनले संसोधन गर्छ। दुवै महाधिवेशनका प्रतिनिधि भएर त्यस्ता प्रावधानहरू आफै अनुमोदन गर्ने अनि अहिले आफै प्रश्न गर्दै हिँड्ने कुरा अनैतिक हो,’ पोखरेलले भने, ‘राष्ट्रिय महाधिवेशनले पास गरेका विषयमा टिप्पणी गर्दै हिड्ने कुरा अनुशासनहीन र अराजक हो। जसले यस्ता गतिविधि गर्छ, त्यसको प्रतिवाद गर्नुपर्दछ।’
पार्टी र संगठनभित्र फैलिएको यस्तो अराजकता क्षम्य नहुने भन्दै पार्टीका घोषित नीतिको अवज्ञा कुनै प्रकारलले पनि अवज्ञा नगर्न महासचिव पोखरेलले चेतावनी दिए।
-1746009348.jpg)
