चोभार गल्छीका चट्टानहरू हटाउने कुनै तयारी छैन: सहरी विकास मन्त्रालय

सेतोपाटी संवाददाता

काठमाडौं, असार १९

सहरी विकास मन्त्रालयले परापूर्वकालदेखि प्राकृतिक रूपमा रहेका चोभार गल्छीका चट्टानहरू हटाउने कुनै पनि उद्देश्य नरहेको बताएको छ।

काठमाडौं उपत्यकाको पानीको निकासको विन्दु रहेको चोभार गल्छी नजिकैको बागमती नदीको अवरोध हटाउने अधिकार सम्पन्न बागमती सभ्यता एकीकृत विकास समितिको तयारी रहे पनि फरकफरक विचार देखिएकोप्रति मन्त्रालयको ध्यानाकर्षण भएको बताएको छ।

मन्त्रालयले बिहीबार विज्ञप्ति जारी गर्दै चोभार गल्छीभन्दा माथि विगतमा बगाएर ल्याएको फोहोरहरू हटाउने, पहिरो जानसक्ने सम्भावित क्षेत्रहरूको पहिचान गरी रोकथामको कार्य गर्न तथा यसको दीर्घकालीन समाधानको लागि आवश्यक प्राविधिक अध्ययन गरी कार्ययोजना समेत तयार गर्ने यस मन्त्रालयको उद्देश्य रहेको बताएको हो।

‘बाढी पहिरो जस्ता विपदबाट जनधनको क्षति हुन नदिन तथा नदी किनारमा विस्तार भएको बस्तीहरूको संरक्षण गर्नु हामी सबैको साझा दायित्व हो। काठमाडौं उपत्यकाको पानीको निकास विन्दु चोभारमा रहेको गल्छीको धार्मिक सांस्कृतिक तथा प्राचीन पहिचानलाई अक्षुण्ण राख्दै चोभार गल्छी वरपरको क्षेत्रमा हुनसक्ने डुबान न्यूनीकरणको लागि चोभार गल्छीभन्दा माथि विगतमा बगाएर ल्याएको फोहोरहरू हटाउने पहिरो जानसक्ने सम्भावित क्षेत्रहरूको पहिचान गरी रोकथामको कार्य गर्न तथा यसको दीर्घकालीन समाधानको लागि आवश्यक प्राविधिक अध्ययन गरी कार्ययोजना समेत तयार गर्ने यस मन्त्रालयको उद्देश्य रहेको र गल्छी चौडा गर्ने तथा परापूर्वकालदेखि प्राकृतिक रूपमा रहेका चट्टानहरू हटाउने कुनै पनि उद्देश्य नरहेको ब्यहोरा सबैमा जानकारीको लागि अनुरोध छ,’ मन्त्रालयका प्रवक्ताले जारी गरेको विज्ञप्तिमा भनिएको छ।

मन्त्रालयले चोभार गल्छीभन्दा माथिको अवरोध हटाउनेबारे विपद् जोखिम न्यूनीकरण तथा व्यवस्थापन प्राधिकरण कार्यकारी समितिको ३२ औं बैठकले गरेको निर्णयको व्यहोरा पनि विज्ञप्तिमा उल्लेख गरेको छ।

‘अविरल वर्षाको समयमा चोभार गल्छीबाट हुने नदी प्रवाहमा अवरोध सिर्जना हुँदा वरपरको क्षेत्रमा डुबान हुने गरेकोले आगामी दिनमा उक्त समस्या दोहोरिन नदिन आवश्यकता अनुसार नेपाली सेनासँगसमेत समन्वय गरी विपद् जोखिम न्यूनीकरण गर्न सहरी विकास मन्त्रालयलाई निर्देशन दिने भन्ने पत्र प्राप्त भएकोमा उक्त निर्णय कार्यान्वयन सम्बन्धमा विभिन्न सामाजिक सञ्जाल तथा राजनीतिक दलहरूमा फरक–फरक विचार प्रेषित भै जनमानसमा दुविधा पर्न गएकोले यो प्रेस विज्ञप्ति जारी गरिएको छ,’ मन्त्रालयले भनेको छ।

यो पनि: 'चट्टान फोडेर चोभार गल्छी चौडा पार्न खोजेको होइन, यो हल्ला मात्र हो'