नेकपा (एमाले)का महासचिव शंकर पोखरेलले पूर्वराष्ट्रपति विद्या भण्डारी एमालेले लिएको समृद्धि र विकासको आकांक्षाबाहिर जान नसक्ने विश्वास व्यक्त गरेका छन्।
शनिबार एमाले पोखरा महानगर कमिटीले आयोजना गरेको मदन भण्डारीको ७४ औं जन्म जयन्ती कार्यक्रममा बोल्दै उनले एमालेविरुद्ध ध्रुब खडा गर्न अवसरवादी तत्व सलबलाएको बताए।
‘मलाई लाग्छ हाम्रो सम्माननीय पूर्व राष्ट्रपति नेकपा एमालेको विकास र समृद्धिको आकांक्षाबाट बाहिर जान सक्नुहुन्छ भन्ने म ठान्दिनँ,’ उनले भने, ‘सामाजिक सञ्जालमा अनेक प्रकारका प्रवृत्ति देखा परिराखेका छन्। त्यसका नाममा कतिपय अवसरवादी तत्वहरु सलबलाई राखेका छन्।’
महासचिव पोखरोलले आफू र एमाले उपाध्यक्ष एर्व अर्थमन्त्री विष्णु पौडेलबीच धार जन्माउने कोसिस भएको पनि बताए। त्यसमा सफल नभएपछि अहिले अर्कोतिर खेतीपाती सुरू भएको उनले बताए।
‘शंकर पोखरेल र विष्णु पौडेलका नाममा धार जन्माउने कोसिस भए। कित्ताकाटको प्रयत्न नभएको हो र!,’ उनले भने, ‘आज हेर्नुभयो भने शंकर पोखरेल र विष्णु पौडेल भन्ने कित्ताकाटको आवश्यकता हरायो। त्यो खेतीपाती अर्कातिर सुरू भयो।’
यसरी एमालेलाई कमजोर पार्न ध्रुब खडा गर्ने प्रवृत्ति एमालेको हितमा नभएको महासचिव पोखरेलले बताए।
पार्टी र नेतृत्वविरुद्ध घेराबन्दी र आक्रमण भएको भन्दै उनले कार्यकर्तालाई प्रतिवादमा उत्रिन पनि आह्वान गरे।
‘हाम्रो पार्टी र नेतत्वका विरुद्ध अहिले जुन प्रकारको घेराबन्दी र आक्रमण भएको छ, यसका विरुद्ध कार्यकर्ता स्वाट्ट उत्रिन जरुरी छ,’ उनले भने।
एमालेविरुद्ध राजावादी, माओवादी, रास्वपा र विदेशी शक्तिले आक्रमण र घेराबन्दी गरेको उनको आरोप छ।
