जनमत पार्टीकी लुम्बिनी प्रदेशसभा सदस्य सुमन शर्मा रायमाझीविरूद्ध पक्राउ पुर्जी जारी भएको छ।
बैंकिङ कसुरसम्बन्धी मुद्दामा बर्दियाको गुलरिया नगरपालिका-५ की ४५ वर्षीया रायमाझीविरूद्ध पक्राउ पुर्जी जारी भएको हो।
प्रहरीका अनुसार उनीविरूद्ध जिल्ला अदालत पर्साबाट जेठ १६ गते पुर्जी जारी भएको थियो।
शर्मालाई पक्राउ गर्न पर्सा प्रहरीले बर्दिया प्रहरी कार्यालयमा पनि पत्राचार गरिसकेको छ। त्यसयता रायमाझी फरार छिन्।
उनको खोजी जारी रहेको बर्दियाका प्रहरी प्रवक्ता डिएसपी चक्रडम्मर पालले बताए।
रायमाझीविरूद्ध पर्साकी आशाकुमारी चौहानले बैंकिङ कसुर र चेक अनादर मुद्दा दायर गरेकी थिइन्।
चौहान पनि जनमत पार्टीकै नेता हुन्।
कार्यक्रममा जाँदा चिनजान र परिचय भएपछि उनीहरू बीच सम्बन्ध स्थापित भएको थियो।
त्यसैबीच उनीहरूको लेनदेन भएको थियो।
पर्सा प्रहरीका अनुसार रायमाझीले चौहानसँग साढे ५ लाख रुपैयाँ सापटी लिएकी थिइन्।
रकम फिर्ता मागेपछि रायमाझीले दुई पटक चेक दिएको अनुसन्धानबाट खुलेको छ।
गत भदौमा चौहानलाई दुई लाख ७५ हजार रुपैयाँको चेक दिएकी थिइन्। तर चेक बाउन्स भएको थियो।
अर्को ८० हजार रूपैयाँको पनि चेक पनि बाउन्स भएपछि मुद्दा अघि बढेको हो।
जिल्ला प्रहरी कार्यालय पर्साका प्रहरी निरीक्षक शैलेन्द्रकुमार खड्काले दुई वटा चेक बाउन्स भएको विषयमा पुर्जी जारी भएको बताए।
कुल तीन लाख ५५ हजार रुपैयाँको चेक अनादर र बैंकिङ कसुर सम्बन्धी मुद्दामा अनुसन्धान अघि बढेको उनले बताए।
सांसद रायमाझी मन्त्रीसमेत भइसकेकी छन्।
अघिल्लो प्रदेश सभामा उनी जनता समाजवादी पार्टीकी सांसद थिइन्। तत्कालीन मुख्यमन्त्री शंकर पोखरेल नेतृत्वको सरकारमा उनी जसपाबाट भौतिक पूर्वाधार विकास राज्यमन्त्री बनेकी थिइन्। जसपाले कारबाही गर्न लागेपछि उनले राजीनामा दिएकी थिइन्।
त्यसपछि नेकपा (माओवादी केन्द्र) का कुलप्रसाद केसी मुख्यमन्त्री हुँदा रायमाझी प्रदेशमा कृषी मन्त्री भएकी थिइन्।
दोस्रो पटक उनी जनमतबाट समानुपातिक सांसद भएकी हुन्। चुनावको अन्तिम समयमा उनी जसपा छाडेर जनमत पार्टीमा प्रवेश गरेकी थिइन्।
समानुपातिक सूचीमा परेपछि उनी सांसद भएकी हुन्।
