राष्ट्रिय प्रजातन्त्र पार्टी (राप्रपा) ले सोमबार पनि संसद बैठक बहिष्कार गरेको छ।
भिजिट भिसा प्रकरणमा गृहमन्त्री रमेश लेखकमाथि छानबिनको माग गर्दै आएको राप्रपाले आज पनि संसद बैठक बहिष्कार गर्ने पार्टीका अध्यक्ष राजेन्द्र लिङ्देनले बताए।
प्रतिनिधि सभाको बैठकमा बोल्दै अध्यक्ष लिङ्देनले सभामुख देवराज घिमिरेको भूमिकामाथि पनि प्रश्न उठाएका थिए।
‘हामीले निर्वाचन प्रणाली नै यस्तो बनायौं, जुन निर्वाचन प्रणालीमा अपवादबाहेक बहुमत प्राप्त गर्न सक्दैनौं। सबै विचारहरूले यहाँ उपस्थित हुन पाउने, एक सिट भएको पार्टीले पनि नेतृत्व गर्न पाउने व्यवस्था हो। यसकारण यो संसदमा एक सय सिट भएको पार्टी र एक सिट भएको पार्टीको पनि उत्तिकै मर्यादा र हैसियत हुन्छ,’ लिङ्देनले भने।
गणितमा फरक भए पनि, सरकार बनाउने कुरामा फरक भए पनि कुनै पनि विचारलाई निषेध गर्न नपाइने गरी निर्वाचन प्रणाली बनाइएको अध्यक्ष लिङ्देनले स्मरण पनि गराए।
‘जसले यो निर्वाचन प्रणाली बनायो, उसैले यो विधिलाई उल्लंघन गर्न हुँदैन। त्यसकारण अहिले यो संसदमा जे कुरा भइराखेको छ। सभामुख संसदको अभिभावक हो। र, सभामुख एक सिटको पनि सय सिटको पनि अभिभावक नै हो। संसदमा दुईवटा महत्त्वपूर्ण राजनीतिक दलहरूले महत्वपूर्ण विषयमा आफ्नो फरक विचार राख्दा विरोध जारी राखेका बेला जबर्जस्त अगाडि बढाउने संसदीय मर्यादाको दृष्टिकोणबाट पनि उपयुक्त हुँदैन। सभामुख स्वयमका लागि पनि राम्रो विषय होइन। त्यसकारण समस्या समाधान नभइकन संसद अवरूद्ध भइराखेका बेला संसद जबर्जस्ती अगाडि बढाउने काम नगरोस् भन्ने कुरा आग्रह गर्न चाहन्छु। संसदलाई जबरजस्त अगाडि बढाउने कार्य जारी राख्छ भने यो कर्मकाण्डमा हामी सहभागी हुँदैनौं। हामी बहिष्कार गर्छौं,’ उनले भने।
