अन्तर्वार्ता
संसदको पाँचौं ठूलो दल राष्ट्रिय प्रजातन्त्र पार्टी (राप्रपा) स्थापनाकालदेखि नै राजतन्त्र र हिन्दु राज्यको पक्षमा छ। यो दलले पटक पटक त्यसको पक्षमा आन्दोलन गर्दै आएको छ।
अहिले राप्रपा फेरि एक पटक राजसंस्थाको पुनर्स्थापना, हिन्दु राज्यको स्थापना र संघीयता खारेजीका मूल माग राखेर आन्दोलनको तयारीमा छ। जेठ १५ गते गणतन्त्र स्थापनाको दिन पारेरै आन्दोलन सुरू गर्ने घोषणा भएको छ।
तर यो आन्दोलनको नेतृत्व राप्रपा वा राप्रपाका अध्यक्ष राजेन्द्र लिङ्देनले गरेका छैनन्, ८६ वर्षीय पूर्वपञ्च नवराज सुवेदीको नेतृत्वमा हुँदैछ।
संसदको सबभन्दा ठूलो राजावादी दल र राजावादी खेमामा जनताले सबभन्दा धेरै मत दिएर पत्याएका नेता लिङ्देनले किन यो आन्दोलनको नेतृत्व गरिरहेका छैनन्? यसपालि हुने आन्दोलनको नैतिक जिम्मेवारी र जबाफदेयिता कसले बहन गर्छ?
यो आन्दोलन कस्ता राजा फर्काउनका लागि भएको हो? राजतन्त्र नै फर्काउने हो कि संवैधानिक राजा फर्काउने हो? के उनले संविधानको सीमा मान्छन्?
संविधानले नेपाललाई धर्मनिरपेक्ष राज्य बनाएको छ। धर्मनिरपेक्ष राज्यले कुनै पनि धर्म, संस्कृतिमाथि विभेद नगर्ने भन्छ। हाम्रो संविधानले सदियौंदेखि चलिआएका सबै धर्म र संस्कृतिको संरक्षण गर्ने कुरा लेखेको छ। यस्तो धर्मनिरपेक्षता किन फेर्ने?
संघीयता खर्चिलो भयो, देशले धान्न सक्दैन भनेर राप्रपाले मात्र भनेको होइन, नेपालमा जनसंख्याको ठूलो हिस्साले भनिरहेको छ। संघ र पालिका कायम राखेर प्रेदेश हटाउनुपर्यो भनिरहेको छ।
प्रदेश सरकार, प्रदेश सभा, कर्मचारी र संरचना त्यति धेरै महँगा छन् कि अर्थतन्त्र नै टाट पल्टिन्छ? राप्रपाले यसबारे अध्ययन गरेको छ? केका आधारमा संघीयता खारेज गर्नुपर्यो भन्ने निष्कर्षमा पुगेको हो राप्रपा?
लिङ्देनको नेपाली राजनीतिमा आफ्नै 'ब्रान्ड' छ। उनी दलभित्र लोकतान्त्रिक प्रतिस्पर्धा गरेर अध्यक्ष चुनिएका हुन्। तीन प्रमुख दलका शीर्ष नेताको तुलनामा लिङ्देन सबभन्दा कम उमेरका हुन्। तुलनात्मक रूपमा शालीन र नैतिक हिसाबले बलिया पनि मानिन्छन्।
अब लिङ्देनको राजनीतिक भविष्य राजसंस्था पुनर्स्थापना गर्ने आन्दोलनले उज्यालिन्छ कि धुमिल हुन्छ? यो आन्दोलन तुहियो भने यसले उनको 'ब्रान्ड' मा के असर पर्छ?
हामीले उनलाई यिनै प्रश्न सोधेका छौं।
प्रस्तुत छ राजेन्द्र लिङ्देनसँग सेतोपाटीका प्रधान–सम्पादक अमित ढकालले लिएको भिडिओ अन्तर्वार्ताः
