प्रतिनिधि सभाको राज्य व्यवस्था तथा सुशासन समितिबाट संघीय निजामती सेवा विधेयक पारित भएको छ।
शुक्रबार बसेको समितिको बैठकले सहमतिमा संघीय निजामती सेवा विधेयक पारित गरेको सभापति रामहरि खतिवडाले जानकारी दिए। राप्रपाका सांसद बुद्धिमान तामाङले भने कर्मचारीको ट्रेड युनियन राख्न नहुने भन्दै नोट अफ डिसेन्ट लेखेका छन्।
विधेयकमा 'कुलिङ पिरियड' र कर्मचारीको अवकाश उमेरहद कसरी लागू गर्ने भन्नेजस्ता विषय टुंगिन बाँकी थियो। त्यो पनि आज टुंगो लगाएर विधेयक पारित गरिएको हो।
संघीय निजामती सेवाबाट अवकाश भएकाहरूले संवैधानिक नियुक्ति खान दुई वर्ष पर्खनुपर्ने भएको छ। अर्थात् कुलिङ पिरियड दुई वर्ष राख्ने सहमति भएको हो।
नेपाली कांग्रेस र नेकपा (माओवादी केन्द्र) लगायत बहुमत सांसद कुलिङ पिरियड दुई वर्ष राख्ने पक्षमा उभिएका थिए। नेकपा (एमाले) का सांसदहरू एक वर्ष कुलिङ पिरियड राख्नुपर्नेमा थिए।
तर एमालेका सांसदहरू आज दुई वर्ष कुलिङ पिरियड राख्न सहमत भएपछि विधेयक पारित हुने अवस्था बनेको हो।
शिक्षा मन्त्रीसमेत रहेका एमाले सांसद रघुजी पन्तले लामो समयदेखि कुलिङ पिरियड एक वर्ष राख्नुपर्ने पक्षमा वकालत गर्दै आएका थिए। तर आज उनले दुई वर्ष कुलिङ पिरियड राख्न आफू पनि सहमत रहेको धारणा राखेका थिए।
कुलिङ पिरियड कति वर्ष राख्नेमा सत्तारूढ नेपाली कांग्रेस र एमालेकै सांसदहरूबीच यसअघि मतभेद देखिएपछि गृहमन्त्री रमेश लेखकले समय मागेका थिए। उनले पाँच/छ दिनभित्र यसबारे सहमतिमा पुग्ने बताएका थिए।
आज समिति बैठकमा बोल्दै गृहमन्त्री लेखकले दुई वर्ष कुलिङ पिरियड राख्ने प्रस्ताव गरे। सांसदहरूले सहमति जनाए र सर्वसम्त रूपमा विधेयक पारित भयो।
साथै कर्मचारीको अवकाश उमेर हद ५८ वर्ष रहेकोमा ६० वर्ष राख्ने सहमति भएको छ। ६० वर्षमा कर्मचारी अवकाश हुने सहमति यसअघि नै बने पनि कसरी कार्यान्वयन गर्ने भन्नेमा मतभेद थियो।
अब चरणबद्ध रूपमा कार्यान्वयन गर्ने सहमति भएको छ।
विधेयक पारित भएको वर्ष ५८ वर्षमै कर्मचारी अवकाश हुनेछन् भने त्यसको एक वर्षपछि ५९ र त्यसको एक वर्षपछि ६० वर्षमा अवकाश हुने गरी सांसदहरूले विधेयकमा सहमति जुटाएका हुन्।
