नेकपा (एमाले) निकट अनेरास्ववियुले प्रतिनिध छनोटको दिन तोकेको छ। बिहीबार बसेको प्रतिनिधि व्यवस्थापन उपसमितिले जेठ ५ भित्र बाँकी जिल्ला अधिवेशन गरिसक्न पनि निर्देशन दिएको संगठनका महासचिव नरेश रोकायाले जानकारी दिए।
अनेरास्ववियुको २४ औं राष्ट्रिय महाधिवेशन आगामी जेठ २५ देखि २८ गतेसम्म काठमाडौंको कीर्तिपुरमा हुँदैछ। त्यसका लागि प्रतिनिधि छनोटको मिति तोकिएको हो।
संगठनका प्रवक्ता प्रकाश पौडेलका अनुसार जेठ १० गते क्याम्पस वा सो सरहका कमिटीको प्रतिनिधि छनोट हुनेछ। जेठ १२ गते जिल्ला वा सो सरहको कमिटीको प्रतिनिधि छनोट हुनेछ। जेठ १४ गते प्रदेश वा सो सरह बाट प्रतिनिधि छनोट गर्ने निर्णय भएको पौडेलले जानकारी दिए।
अनेरास्ववियुभित्र उमेरहद लगाउने विषयमा पनि छलफल जारी छ। २३ औं राष्ट्रिय सम्मेलनपछि अनेरास्ववियुले ३० वर्षमुनिकालाई केन्द्रीय कमिटीमा मनोनीत गरेको थियो। क्याम्पस कमिटीको अध्यक्ष हुन २८ वर्ष पूरा नभएको हुनुपर्ने व्यवस्था लागू गरेको थियो।
यसपटकको अधिवेशनबाट अनेरास्ववियुमा ३०/३२ वर्षे उमेरहद लगाउने वा खुला राख्ने विषयमा अहिले संगठनभित्र बहस छ।
यो पनि: एमाले अखिलमा उमेर हदको चर्चा: ३०/३२ वर्ष या खुला राख्नेबारे महाधिवेशनले गर्नेछ निर्णय
