नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले आफू अहिले सरकार परिवर्तनको पक्षमा नभएको बताएका छन्।
प्रतिनिधि सभामा सोमबार नीति तथा कार्यक्रममाथिको छलफलमा भाग लिएर बाहिरिने क्रममा पत्रकारहरूसँग कुराकानी गर्दै उनले अहिले आफू सरकार परिवर्तन गर्नेतिर नलागेको प्रष्टाएका हुन्।
‘सरकार बनाउनेतिर अहिले हाम्रो ध्यान छैन। हाम्रो ध्यान जनतामै जाने छ। तपाईंहरूले थाहा पाइसक्नुभयो, अब मध्यपहाडी लोकमार्ग अभियानमा जाँदैछौं,’ उनले भने, ‘जादु चलाए त चल्छ तर अहिले चलाउने पक्षमा हामी छैनौं।’
यो पनि: प्रचण्डको फेरिएको बोली
यस्तै उनले नेपाली कांग्रेसका सभापति शेरबहादुर देउवालाई पनि फकाउने पक्षमा आफू नरहेको बताए। उनले आफ्नै बोझले अहिलेको सरकार ढल्ने दाबीसमेत गरेका थिए।
सरकारले आगामी आर्थिक वर्षको लागि ल्याएको नीति तथा कार्यक्रम झारो टार्ने काम मात्रै भएको उनले बताए।
‘तपाईंहरूले देख्नुभएको छ, हामी ब्यापक रूपमा पूर्वदेखि पश्चिमसम्म जनतासँग जे संवाद गरियो जनभावना जे बुझियो त्यसैको आधारमा धारणा राखेको हो मैले। नीति कार्यक्रम झारा टार्ने, औपचारिकता पूरा गर्ने, केही नि नभएको नीति कार्यक्रम भएको हुनाले मैले आफ्नो विचार, आफ्नो भावना, जनताको आवश्यकता, राखेको हो,’ उनले भने।
पत्रकारले कतिपय नीतिहरू पुरानै कपी पेस्ट गरिएकोबारे पनि प्रश्न गरेका थिए।
त्यसमा उनले जबाफ दिँदै भने, ‘कपी पेस्ट गर्नु, पनि झारा टार्नु नै हो। एक वर्ष अगाडिदेखि पछिसम्म धेरै विकास भइरहेको छ। नयाँ सिर्जनात्मक र रचनात्मक र जनतालाई राष्ट्रको पक्षमा केही पनि छैन।’
