प्रतिनिधि सभाको सोमबारको बैठकमा प्रधानमन्त्री केपी शर्मा ओली र प्रमुख प्रतिपक्षी दल नेतासमेत रहेका नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सौहार्दपूर्ण कुराकानी गरिरहेको तस्बिर प्रधानमन्त्री ओलीकै सचिवालयबाट सार्वजनिक भयो।
कहिले प्रधानमन्त्रीले बैठकमा सम्बोधन गर्न खोज्दा प्रतिपक्षी दल नेता उपस्थित नहुने त कहिले प्रतिपक्षी दल नेता बोल्न समय लिँदा प्रधानमन्त्री अनुपस्थित रहने सिलसिला नै चलेको थियो।
तर सोमबार फरक दृश्य देखियो।
प्रतिनिधि सभा बैठकमा प्रमुख प्रतिपक्षी दलका नेता प्रचण्डसँग एउटै ‘फ्रेम’मा हँसमुख मुद्रामा देखिएका केपी शर्मा ओली संसद भवनभित्र प्रवेश गर्ने क्रममा भने रिसाएका थिए।
प्रतिनिधि सभा बैठकमा नीति तथा कार्यक्रम छलफलका लागि प्रस्तुत गर्न प्रधानमन्त्री ओली संसद् भवन परिसरमा पुग्दै गर्दा सञ्चारकर्मीले घेरेका थिए। त्यहाँ बाक्लै सञ्चारकर्मीको उपस्थिति थियो।
प्रधानमन्त्रीको गाडी रोकिनेबित्तिकै केही सञ्चारकर्मी नमस्कार भन्दै अघि बढेका थिए। प्रधानमन्त्री ओली हँसमुख मुद्रामै सबैलाई नमस्कार गर्दै अगाडि बढिरहेका थिए।
त्यतिबेला एकजना सञ्चारकर्मीले उनलाई ‘भाजपा नेता (विजय चौथाइवाले) को भ्रमणपछि माओवादीसँगको सम्बन्ध अलि मिलेको हो?’ भन्दै प्रश्न गरे।
प्रधानमन्त्रीले उनको प्रश्नलाई स्वाभाविक रूपमा लिएनन्।
संसद भवन छिर्ने सिँढीतर्फको भाग देखाउँदै प्रधानमन्त्रीले भने ‘यतापट्टि छेक्नुहोस् न! तरिका हुन्छ नि तपाईंहरूको नि!’
पत्रकारहरूले सांसदहरू संसद भवन आउजाउ गर्ने बाटो नै छेक्ने गरी माइक तेर्साएर प्रश्न सोध्ने गरेकोमा ओलीले पटक-पटक असन्तुष्टि व्यक्त गर्दै आएका छन्।
