नेकपा (एमाले) ले आफ्नो नेतृत्वको सरकार ढाल्ने कसरत कमजोर भएको निष्कर्ष निकालेको छ। आइतबार ललितपुरस्थित पार्टी केन्द्रीय कार्यालयमा बसेको सचिवालयको ५१ औं बैठकले मुलुक मूलतः राजनीतिक स्थायित्व र नीतिगत स्थिरताको बाटोमा अघि बढिरहेको निचोड निकालेको हो।
‘यद्यपि यो स्थिरतालाई खल्बल्याउन र यसलाई कमजोर पार्नका निम्ति विभिन्न पक्षहरू क्रियाशील पनि भइरहेका छन्। तर उनीहरूको प्रयास सफल नहुने, त्यो प्रयास कमजोर बन्दै गएको र मुलुक राजनीतिक स्थायित्वको दिशामा अघि बढेको बैठकले निष्कर्ष निकालेको छ,’ सचिवालय बैठकपछि नेकपा (एमाले) का उपमहासचिव प्रदीप ज्ञवालीले भने।
पार्टीलाई आगामी निर्वाचनमा बहुमत प्राप्त बलियो शक्ति बनाउन एमालेलाई एकताबद्ध बनाउने निर्णय गरेको उनले बताए।
पार्टीलाई बहुमतसहितको बलियो राष्ट्रिय शक्ति बनाउन एमालेको सबै सामर्थ्य प्रयोग गर्ने निर्णय गरेको उनले बताए।
‘पार्टीलाई आगामी निर्वाचनमा बहुमत प्राप्त बलियो शक्ति बनाउनका लागि पार्टी सम्पूर्ण एकताबद्ध गर्न र पार्टीभित्रको सम्पूर्ण ऊर्जालाई, पार्टीभित्रको सामर्थ्यलाई एकताबद्ध भएर अघि बढाउनका लागि थप प्रयास गर्ने,’ बैठकपछि ज्ञवालीले भने।
एमालेको सचिवालय बैठकमा सरकारले शुक्रबार ल्याएको नीति तथा कार्यक्रमबारे छलफल सुरू भएको छ। यो छलफल जारी रहने ज्ञवालीले बताए।
आज प्रधानमन्त्रीसमेत रहेका पार्टी अध्यक्ष केपी शर्मा ओली प्रमुख प्रतिपक्षी दलका नेता नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’सँगको छलफलमा जानुपर्ने भएकाले विषय प्रवेश मात्रै भएको एमालेले बताएको छ।
