नेकपा (माओवादी केन्द्र) का उपमहासचिव वर्षमान पुनले पार्टी सरकारमा जान पर्ने अवस्था आउन सक्ने बताएका छन्।
बिहीबार सिन्धुपाल्चोकको चौतारामा पार्टीनिकट वाइसिएल नेपालको पाँचौं जिल्ला सम्मेलनलाई सम्बोधन गर्दै पुनले ०८४ सम्म सरकारमा नजाने अडान रहे पनि व्यवस्थामाथि नै प्रश्न उठेकाले त्यसलाई जोगाउन सरकारमा जानुपर्ने अवस्था आउन सक्ने बताएका हुन्।
'हामीले २०८४ सालसम्म सरकारमा नजाने भनेको हो, तर ओली सरकारले व्यवस्था बचाउन सकेन भने हामी सरकारमा जानुपर्ने हुनसक्छ। त्यतिबेला २०८४ पर्खेर बस्ने भन्ने हुँदैन,' उनले भने।
पुनले ओली नेतृत्वको वर्तमान सरकार असफल भइसकेको बताए। 'अब ढल्न मात्रै बाँकी हो,' उनले भने।
उनले सरकार विचौलियाले बनाएको पुष्टि भइसकेको बताउँदै तिनै विचौलियाहरूको स्वार्थ नमिल्दा राष्ट्र बैंकले अहिलेसम्म गभर्नर पाउन नसकेको बताए।
‘बिचौलियाहरूअहिले राष्ट्र बैक कब्जा गर्न अर्बको डिल गरिरहेका छन्, अहिलेसम्म गभर्नर नबन्नुको कारण यही हो,' उनले भने।
माओवादी सरकारमा गए पनि जनताको काम गर्छ भन्ने स्थापित भएको उनले बताए।
'सरकारमा गए पनि जनताको काम गर्ने, जनपक्षीय माओवादी धार बनाउने र २०८४ को चुनावको तयारी गर्ने काम नै हुन्छ,’ उनले भने।
यद्यपि ०८४ को चुनावमा भने माओवादी एक्लै लड्ने कुरामा कुनै द्विविधा नभएको पनि पुनले बताए।
'कांग्रेस–एमालेसँग मिल्दा कमजोर भएका थियौं, अब त्यो गल्ती हुँदैन। कार्यनीतिक रुपले सहकार्य होला तर रणनीतिक रुपले हामी छुट्टै धारसहितको दल हौं। वर्गप्रति इमान्दार, धारमा प्रष्ट हुँदै जानेछौं,’ उनले भने।
एमालेभित्र ओली प्रवृत्ति कायम रहँदासम्म दुई ठूला कम्युनिष्ट एक ठाउँमा आउने अवस्था नरहने उनले बताए। यद्यपि त्यहाँ भित्रका इमान्दार कम्युनिस्ट र अरू कम्युनिस्ट पार्टीहरूसँग सहकार्य गर्न सकिने उनले बताए।
