प्रधानमन्त्री केपी शर्मा ओलीले नेकपा (एमाले) ले सरकार बनाऊ, सरकार बचाऊ भन्दै नहिँडेको बताउँदै नेता–कार्यकर्ताले मिसन २०८४ मा ध्यान दिनुपर्ने बताएका छन्।
पार्टीले काठमाडौंमा बिहीबार गरेको युथ सेलिब्रेसनमा बोल्दै उनले राष्ट्रियताको स्पष्ट अडान लिएको हुनाले विदेशका दलाल तत्वहरू एमालेविरूद्ध खनिएको बताए।
‘यतिकै होइन, हाम्रो राष्ट्रियताप्रतिको दृष्टिकोणले, अडानले र हाम्रो संघर्षका कारणले। अर्को जनपक्षीयताको कारणले लोकतान्त्रिक आचरण, अभ्यास, दृष्टिकोण र देशलाई अगाडि बढाउने स्पष्ट नीतिका कारणले। विभिन्न प्रकारका शक्तिहरू हामीसँग भयभीत भएका छन्। दिनैपिच्छे अनेक प्रकार भ्रम फिँजाउन खोजिरहेका छन्,’ उनले भने।
विरोधी तत्त्वहरूले हरेक कुरामा सरकार जान्छ, सरकार जान्छ भनेर भन्न थालेको बताउँदै लोकतन्त्रमा सरकार लामो कति समयका लागि बन्छ? भन्दै प्रश्न गरे।
‘लोकतन्त्रमा सरकार लामो कति समयका लागि बन्छ? पाँच वर्ष। अनि यो तानाशाही व्यवस्था त होइन। अधिनायकवाद त होइन। ५० वर्षको वंशको शासन हुन्छ। सय वर्षको हुन्छ। २५० वर्षका लागि हुन्छ। १०४ वर्षका लागि हुन्छ,’ उनले भने।
एमालेले भनेको स्थिरता लोकतन्त्रको, गतिशीलताको र जनताको अभिमतसहितको स्थिर भएको बताए।
‘यतिबेला नेकपा (एमाले) र कांग्रेसको एउटा संकल्पसहित बनेको सरकार हो। सरकारको बारेमा धेरै चिन्ता गर्ने होइन। चुनावको बारेमा चिन्ता गर्नुपर्छ। यसैकारण एमालेले सरकार बनाऊ, सरकार बचाउ भनेर कराएको छैन। नेकपा (एमाले)ले जहिले पनि चुनाव हेरेको हुन्छ। हामीले २०७० को चुनाव भन्यौं। २०७४ को चुनाव भन्यौं। २०७९ को चुनाव भन्यौं र २०८४ को चुनाव भनिरहेका छौं। ढुक्कले मिसन २०८४मा लाग्नुस्,’ उनले भने।
अहिले संसदको बनावट अनुसार सरकार चलाउने, सरकारको नेतृत्व गर्ने, सरकारमा सहभागी हुने जे गर्नुपर्छ, ठीक ढंगले एमालेले गर्ने पनि बताए। ‘त्यसकारण यसको चिन्ता नगर्नुस, मिसन २०८४ मा ध्यान दिनुस्,’ एमाले अध्यक्ष ओलीले भने।
यो पनि: पर्यो भने हामी यस्तो सरकारबाट बाहिर जान्छौं: गगन थापा
