इलाका प्रहरी कार्यालय काँकडभिट्टामा राखिएका चार जना भुटानी शरणार्थीलाई बेलडाँगी शरणार्थी शिविर वा अन्य ठाउँमा राखेर अनुसन्धान गर्न सर्वोच्च अदालतले आदेश दिएको छ।
बिहीबार न्यायाधशीहरू बालकृष्ण ढकाल र नित्यानन्द पाण्डेयको इजलासले चार जना शरणार्थीलाई शिविर वा अन्य उपयुक्त स्थानमा राख्न आदेश जारी गरेको हो।
अध्यागमन विभागले आशिष सुवेदी, रोशन तामाङ, सन्तोष दर्जी र अशोक गुरूङमाथि अनुसन्धान गरिरहेको थियो। अनुसन्धानको क्रममा विभागले उनीहरूलाई इलाका प्रहरी कार्यालय काँकडभिट्टालाई ‘स्थान’ तोकेर अनुसन्धान गरिरहेको थियो।
त्यस विषयमा इजलासले २४ घण्टाभित्र इलाका प्रहरी कार्यालय काँकडभिट्टाबाट अन्य उपयुक्त ठाउँमा स्थानान्तरण गर्न आदेश जारी भएको हो।
‘निवेदकहरू संयुक्त राज्य अमेरिका जानु अगाडिको झापा बेलडाँगी शरणार्थी शिविर वा अन्य उपयुक्त स्थानलाई स्थान हद तोकी निवेदकहरूलाई हाल राखेको इलाका प्रहरी कार्यालय काँकडभिट्टाबाट स्थान हद तोकिएको उपयुक्त स्थानमा स्थानान्तरण गरी...’ आदेशमा भनिएको छ।
यस्तै उनीहरूमाथि अनुसन्धान गर्दा जे जस्तो विषय बुझ्नुपर्ने भए पनि ६० दिनभित्र सम्पन्न गर्न भनेर आदेश जारी गरेको छ।
‘... निवेदकहरूका सम्बन्धमा जो जे बुझ्नुपर्ने बुझी परचलित कानून बमोजिमको अनुसन्धानको कार्य आगामी ६० दिनभित्र सम्पन्न गर्नू गराउनू भनी विपक्षीहरूको नाममा यो आदेश जारी गरिदिएको छ,’ आदेशमा भनिएको छ।
आशिष, रोशन र सन्तोष चैत १६ गते बेलडाँगी शिविरबाट पक्राउ परेका थिए। अशोक चैत १९ देखि काँकडभिट्टाबाट प्रहरीले पक्राउ गरेको थियो। उनीहरूलाई प्रहरीले अध्यागमन विभागलाई बुझाएको थियो।
उनीहरू पक्राउ परेपछि आशिषका बुवा नारायणकुमार सुवेदीले सर्वोच्च अदालतमा गत चैत ३ गते बन्दीप्रत्यक्षीकरणको रिट दायर गरेका थिए।
यो पनि:
१० वर्ष एक्लै जीवन बिताएका सुवेदीको काँधमा ट्रम्पले फिर्ता पठाएका चार जनाको भारी
