राष्ट्रिय स्वतन्त्र पार्टी (रास्वपा) को केन्द्रीय समिति बैठक बिहीबार बस्दैछ।
पार्टी केन्द्रीय कार्यालय चःमतिमा दिउँसो २ बजे बोलाइएको बैठकले पार्टीको पहिलो महाधिवेशनसम्बन्धी निर्णय गर्ने केन्द्रीय सदस्य शंकर श्रेष्ठले जानकारी दिए।
रास्वपाको राष्ट्रिय परिषद्को गत असोजमा बसेको पहिलो बैठकले वैशाखको २५, २६, २७ गते पहिलो महाधिवेशन गर्ने निर्णय गरेको थियो।
लगत्तै बसेको केन्द्रीय समिति बैठकले चितवनमा राष्ट्रिय महाधिवेशन गर्ने गरी ठाउँ तय गरेको थियो।
पार्टी सभापति रवि लामिछाने सहकारी ठगी, संगठित अपराध अभियोगमा कारागार नै चलान भएपछि महाधिवेशन अनिश्चित बनेको थियो।
त्यसो त सभापति लामिछाने पार्टीको जिम्मेवारीमा फर्कनुअघि नै महाधिवेशन सार्ने तयारी भएको थियो। सभापति लामिछाने पार्टीको जिम्मेवारीमा फर्किएलगत्तै बसेको केन्द्रीय समितिले वैशाखमै महाधिवेशन गर्ने निर्णय गरेको थियो।
तर गत चैत २२ गते सभापति लामिछानेविरूद्ध रुपन्देही जिल्ला अदालतले गरेको आदेश उल्ट्याउँदै उच्च अदालत तुलसीपुरको बुटवल इजलासले थुनामा पठाउने निर्णय गरेपछि रास्वपा महाधिवेशन सार्ने तयारीमा जुटेको हो।
जिल्ला भेला, वडा र पालिका तहका कमिटी अधिवेशन नभइसकेकाले रास्वपा महाधिवेशन सार्नेपर्ने दबाबमा थियो। सभापति नै कारागार चलान भएपछि सार्नुपर्ने कारण अझ बलियो बनेको रास्वपाका नेताहरू बताउँछन्।
संगठन विभाग सचिवसमेत रहेका श्रेष्ठले रास्वपाले अहिलेसम्म ७१ जिल्लामा भेला गरेर कमिटी बनाएको बताए।
डोल्पा, रुकुमपूर्व, मनाङ, मुस्ताङ, रसुवा, सप्तरी जिल्लामा भेला गर्न बाँकी छ। अहिलेसम्म १००० जति वडा तहका अधिवेशन भएका छन्। १३–१४ वटा मात्रै पालिका तहको कमिटीको अधिवेशन भएको श्रेष्ठले बताए। १५–२० वटा पालिकाले अधिवेशनको मिति तोकेकाले महाधिवेशनअगाडि बाँकी पालिकाको अधिवेशन गर्न सम्भव छैन।
‘यही अवस्थामा महाधिवेशन गर्न राष्ट्रिय महाधिवेशन वडा अधिवेशनको प्रक्रियाबाट सुरू हुनेछ भन्ने विधानको व्यवस्था निलम्बन गर्नुपर्ने हुन्छ,’ उनले भने।
रास्वपाको विधानको धारा ४१ (१) मा राष्ट्रिय महाधिवेशन वडा अधिवेशनको प्रक्रियाबाट थालनी हुने उल्लेख छ। पालिका अधिवेशन गर्नका लागि पालिका भित्रका सबै वडाका अधिवेशन भइसकेको हुनपर्नेछ व्यवस्था उपधारा २ मा छ।
कुनै कारणवश पालिका भित्रका कुनै वडाको अधिवेशन गर्न सम्भव नभए केन्द्रीय संगठन विभागले निर्णय गरी सो वडाको अधिवेशन थाती राखी पालिका अधिवेशन गर्न सकिने पनि विधानमा प्रबन्ध गरिएको छ।
यी सबै कारणले वैशाखमै महाधिवेशन हुनेमा उनले शंका व्यक्त गरे।
‘तर अधिवेशन सार्दा पनि हामी लामो समयका लागि सार्दैनौं। सभापति रवि लामिछानेलाई सहज हुनेबित्तिकै महाधिवेशनको तिथि तोक्ने गरी अहिलेलाई सार्छौं मात्रै,’ उनले भने।
रास्वपाले वडा तहको मात्रै तीन पटक अधिवेशन गरिसकेको छ। सुरूमा अनलाइन एपमार्फत् उम्मेदवारी दिन लगाएको रास्वपाले पछि सदस्यताहरूको संख्याको आधारमा अर्को कमिटी बनाएको थियो।
अहिले पुनः वडा तहकै कमिटीको अधिवेशन गरिरहेको छ। रास्वपाले जिल्लामा संयोजक र सहसंयोजक मात्रै रहने व्यवस्था गरी कार्यकारी अधिकार दिएको थिएन।
अहिले त्यस नीतिलाई परिवर्तन गरी जिल्ला कमिटी नै बनाइरहेको छ।
बिहीबार बस्ने बैठकमा जनयात्रा कार्यक्रम, ब्लुप्रिन्ट कार्यदल, लिडरसिप एकेडेमी, प्रशिक्षण, संगठन सबलीकरणबारे सदस्यहरूले विशेष रिपोर्टिङ गर्ने कार्यसूची रहेको रास्वपाले बताएको छ।
अघिल्लो केन्द्रीय समिति बैठकले पार्टीको तर्फबाट राष्ट्रनिर्माण सम्बन्धी खाका तयार गर्न उपसभापतिद्वय डोलप्रसाद अर्याल र स्वर्णिम वाग्लेको संयोजकत्वमा पूर्वमन्त्रीहरू सुमना श्रेष्ठ, शिशिर खनाल, विराजभक्त श्रेष्ठ र डा. तोसिमा कार्की सम्मिलित मिसन ब्लुप्रिन्ट कार्यदल गठन गरेको थियो। त्यस्तै लिडरसिप एकेडेमी र उम्मेदवार क्लबको कार्यान्वयनका लागि सहमहामन्त्रीद्वय सुमना श्रेष्ठ र विपिनकुमार आचार्यलाई जिम्मेवारी तोकिएको थियो।
पार्टीको जनयात्रा कार्यक्रमको कार्यविधि लगायतको संयोजनको जिम्मेवारी संसदीय दलका उपनेता विराजभक्त श्रेष्ठलाई दिइएको थियो।
-ink-1735961275.jpeg)
