सरकारले भूकम्पग्रस्त म्यानमारमा खाद्यान्न तथा बन्दोबस्तीको सामान पठाउने निर्णय गरेको छ।
मन्त्रिपरिषद्को सोमबार साँझ बसेको बैठकले म्यानमारका भूकम्प प्रभावितलाई राहत सामग्री पठाउने निर्णय गरेको सरकारका प्रवक्ता सञ्चार तथा सूचना प्रविधिमन्त्री पृथ्वीसुब्बा गुरूङले जानकारी दिए।
उनकाअनुसार म्यानमारका भूकम्प प्रभावितहरूको खोज, उद्धार र राहतका लागि नेपाली सेनासमेत पठाउने निर्णय भएको सञ्चारमन्त्री गुरूङले जानकारी दिए।
‘म्यानमारको भूकम्प प्रभावितका लागि आवश्यक राहत सामग्री पठाउने निर्णय भएको छ। त्रिपाल, खाद्यान्न, भाँडावर्तन त्यहाँ आवश्यक पर्ने सामग्रीहरूको विवरण म्यानमारमा रहेको हाम्रो राजदूतावासले पठाउँछ। दूतावासले माग गरेको सामग्री खरिदका लागि अर्थ मन्त्रालयलाई निर्देशन पनि दिइसकेको छ’ उनले भने।
नेपाल वायु सेवा निगमको जहाजमार्फत् ती सामग्री म्यानमार पठाइने उनले बताए। नेपाली सेनाको एक टुकडी सैनिक विमानमार्फत् नै म्यामार खोज र उद्धारका लागि जानेछ।
म्यानमारको राजधानी नापिडो आसपास केन्द्र गरी गएको ७.७ म्याग्निच्युडको भूकम्पमा परी हालसम्म दुई हजारभन्दा बढी मानिसको मृत्यु भएको छ। उक्त भूकम्पबाट तीन हजार बढी घाइते भएको त्यहाँका सञ्चारमाध्यमले जानकारी दिएको छ।
खोज र उद्धारमा समस्या भएपछि म्यानमारले विश्व समूदायलाई सहयोगका लागि आह्वान गरेको छ। चीन, भारतलगायत आसपासका देशहरूले खोज, उद्धारका लागि सेना र बन्दोबस्तीका सामग्री पठाएका छन्।
