राष्ट्रिय स्वतन्त्र पार्टी (रास्वपा) ले ६८ जिल्लामा भेला सकेको छ।
रास्वपाका कार्यवाहक महामन्त्री कविन्द्र बुर्लाकोटीले रसुवा र जुम्लामा चैत मसान्तभित्रमा जिल्ला भेला गरिसक्ने तय भएको बताए।
महाधिवेशन लक्ष्य गरेर रास्वपाले गत कात्तिक १ गतेदेखि जिल्ला भेलालाई अभियानकै रूपमा अघि बढाएको थियो।
गत असोजमा बसेको राष्ट्रिय परिषद्को पहिलो भेलाले वैशाखको २५, २६, २७ गते महाधिवेशन गर्ने निर्णय गरेको थियो।
महाधिवेशनको कार्यतालिकाअनरूप नै जिल्ला भेला अघि बढाउने निर्णय गरेको थियो।
त्यसो त रास्वपाको यसअघिको पार्टी संरचनामा जिल्लामा संयोज र सहसंयोजक मात्रै रहने व्यवस्था थियो। जिल्ला समितिको भूमिका कार्यकारी थिएन।
पछि केन्द्रीय समितिको बैठकले विधान संशोधन गर्दै जिल्ला संरचना व्यवस्थित गरेको थियो।
अहिले १ देखि २ निर्वाचन क्षेत्र भएका जिल्लामा १३ र १० सम्म निर्वाचन क्षेत्र भएका जिल्लामा २३ सदस्यीयसम्म समिति बनाउन सकिने बुर्लाकोटीले बताए।
उनकाअनुसार मनाङ, मुस्ताङ, पूर्वी रूकुम, नवलपुर, सप्तरी, डोल्पा बर्दियामा जिल्ला भेला भएका छैनन्।
यसमध्ये चारवटामा चैत मसान्तभित्र गरिसक्न निर्देशन दिएको बुर्लाकोटीले बताए।
रास्वपाका अनुसार चैतको पहिलो साताभित्र जिल्ला भेला सकिसक्ने कार्यतालिका थियो।
जिल्ला भेलाकै समयावधि घर्किएकाले वैशाखमा हुने महाधिवेशन प्रभावित बनेको छ।
अझ समस्या पालिका तहका समितिमा देखिएको छ।
रास्वपाले पालिका तहका समितिको अधिवेशनलाई गति दिन सकेको छैन। अहिलेसम्म झापाको बुद्धशान्ति गाउँपालिका र कन्काई नगरपालिका, काठमाडौंको कागेश्वरी मनहरा नगरपालिका, नवलपुरको गैडाकोट नगरपालिका र कञ्चनपुरको पुनर्वास नगरपालिकाको मात्रै अधिवेशन सकिएको छ।
रास्वपाको विधानमा जिल्लाबाट सभापतिसहित ५ जना राष्ट्रिय महाधिवेशनको प्रतिनिधि हुनेछन्। जसमा एकजना महिला अनिवार्य गरिएको छ।
पालिका तहको समितिबाट सभापति या सभापति उपस्थित हुन नसके समितिले तोकेको एक जना प्रतिनिधि रहनेछन्।
२०१ भन्दा बढी पार्टी सदस्य भएको गाँउपालिकाबाट १ जना, ४०१ भन्दा बढी पार्टी सदस्य भएको नगरपालिकाबाट २ जना, ५०१ भन्दा बढी पार्टी सदस्य भएको उपमहानगरपालिकाबाट ३ जना र ७०१ भन्दा बढी पार्टी सदस्य भएको महानगरपालिकाबाट ४ जना प्रतिनिधि रहने पनि विधानमा व्यवस्था छ।
७५३ पालिकामध्ये ५ वटामा मात्रै अधिवेशन भएकाले वैशाखमै पहिलो महाधिवेशन हुन सक्ने अवस्था देखिँदैन।
अहिलेसम्म झापाको दमक नगरपालिका, कन्चनपुरको कृष्णपुर नगरपालिका र बेलडाँडी नगरपालिका, चितवनको रत्ननगर नगरपालिका, रुपन्देहीको कञ्चन गाउँपालिकामा मात्रै अधिवेशनको मिति तोकिएको छ।
बाँकीमा अनिश्चित छ।
