पोखरास्थित पृथ्वीनारायण क्याम्पसको स्वतन्त्र विद्यार्थी युनियनको चुनाव स्थगित भएको छ। निर्वाचन समितिले यहाँको स्ववियु चुनाव बुधबार हुने बताएको छ।
स्ववियु निर्वाचन मंगलबारलाई तय गरिएको थियो। बिहान ८ बजे विद्यार्थीहरू भोट हाल्न लाइनमा बसेपछि मतपत्रमा त्रुटि भेटिएको भन्दै विद्यार्थी संगठनले आपत्ति जनाएपछि मतदान स्थगित गरिएको हो।
‘मतदान केन्द्रमा स्ववियुको निर्वाचन मंगलबार बिहान ८ बजे मतदान सुरु गर्ने प्रक्रियामा प्रत्यक्षतर्फको मतपत्रको दोस्रो कोलममा रहेको अखिल (छैठौं) को अध्यक्ष पदको उम्मेदवारको नामको पछाडि रेजा लगाउने बक्स छुट हुन गएकोमा स्ववियु निर्वाचन समिति गम्भीररूपले आत्मआलोचित भएको छ। सम्बन्धित संघ, संगठन, संयुक्त प्यानल र स्वतन्त्र उम्मेदवारको प्रतिनिधिहरूको रायबमोजिम उक्त मतपत्र रद्द गरी पुनः मतपत्र छपाई गरी ल्याउँदा ढिला भएको र समय अभावका कारण मतदान कार्य सुरू गर्न नसकिएको हुँदा उक्त मतदान कार्य चैत्र ६ गते बुधबारका दिन बिहान ८ः०० बजेदेखि सुरू हुने जानकारी गराइन्छ,’ निर्वाचन समितिले जनाएको छ।
त्रिभुवन विश्वविद्यालयका ४० बढी आंगिक क्याम्पस र एक हजार बढी सामुदायिक क्याम्पसमा स्ववियु चुनाव भइरहेको छ।
