२०७९ को असारमा नेकपा (माओवादी केन्द्र) र नेकपा (एकीकृत समाजवादी) बीच पार्टी एकता हुने चर्चा शिखरमा थियो।
त्यतिबेला नै पार्टी एकता गर्ने भन्दै नेताहरूले कार्यदल बनाउने र २०७९ को मंसिरको प्रतिनिधि सभा र प्रदेश सभा निर्वाचनअघि दुई पार्टीबीच एकीकरण गर्ने नेताहरूले बताउँदै आएका थिए।
माओवादी केन्द्रले नेताहरू देव गुरूङ र वर्षमान पुन तथा एकीकृत समाजवादी केन्द्रले बेदुराम भुसाल र प्रमेश हमाल सदस्य रहेको कार्यदल बनाएका थिए।
त्यसबेला यी दुई पार्टीका नेताहरूका बीचमा एकताबारे बाक्लै कुराकानी हुने गर्थ्यो। तर चुनावमा यी दुई पार्टीले एकता गरेनन्। बरू नेपाली कांग्रेस सहितका पार्टीसँग गठबन्धन गरेर चुनावी प्रतिस्पर्धा गरे।
त्यस चुनावमा माओवादी केन्द्रले ३२ र एकीकृत समाजवादीले १० सिट जिते। एकीकृत समाजवादीले थ्रेस होल्ड नकटाएकाले राष्ट्रिय पार्टी बन्न बञ्चित भयो।
त्यसयता पनि यी दुई पार्टीबीच एकता हुने विषय बेलाबेला चर्चामा आयो र त्यत्तिकै सेलायो पनि। बितेको एक वर्ष यता यी दुई पार्टीहरूबीच एकताको कुराकानी ठप्पप्राय: छ।
बरू समाजवादी मोर्चालाई सक्रिय बनाउने नेताहरूले बताउँदै आएका छन्।
तर गत फागुन १ गते खोटाङ पुगेका बेला माओवादी केन्द्रका उपमहासचिव वर्षमान पुनले एकीकृत समाजवादीसँग छिट्टै पार्टी एकता हुन सक्ने बताए।
‘एकीकृत समाजवादीसँग हाम्रो कार्यनीतिक रूपमा धेरै कुरा मिल्छ, ढिलोछिटो हामी एकै ठाउँमा हुने सम्भावना छ,’ उनले भने, ‘युद्ध गर्ने होइन, शान्तिपूर्ण प्रतिस्पर्धाबाटै जान तयार भए वैद्यजी, विप्लवजीहरुसँग पनि एकता हुन्छ। हिजो सँगै लडेका र जनयुद्धको विरासत बोकेका सबै समूहसँग एकताका लागि हामी खुला छौं।’
गत पुसको २१ देखि २३ गतेसम्म काठमाडौंमा बसेको नेकपा माओवादी केन्द्रको केन्द्रीय समिति बैठकले वैद्य, विप्लव र धर्मेन्द्र बास्तोला लगायतको पार्टीसँग जतिसक्दो छिटो एकता गर्ने निर्णय गरेको छ। यसको तात्पर्य माओवादी घटकहरूलाई एक ठाउँमा ल्याउनु हो।
‘आजको ठोस सन्दर्भमा विप्लव नेतृत्वको नेकपा, नेपाल समाजवादी पार्टी, नेकपा (बहुमत), आम जनता पार्टीका बीचमा एकताको गम्भीर पहल गर्नु पर्दछ। साथै अन्य क्रान्तिकारी घटकहरूसँग पनि एकताको सम्भावनाबारे खोजी गर्नुपर्दछ,’ माओवादीले पार्टी बैठकको निर्णयमा लेखेको छ, ‘जोसँग तत्काल पार्टी एकता र संयुक्त मोर्चामा आबद्ध हुने स्थिति बन्दैन, त्यस्ता दलहरूसँग कार्यगत एकता गरेर सरकारका राष्ट्र र जनविरोधी क्रियाकलापविरूद्ध जाने नीति लिनुपर्छ।’
तर उपमहासचिव पुनले एकीकृत समाजवादीसँग पनि एकता हुने अभिव्यक्ति दिएपछि हामीले नेकपा एकीकृत समाजवादीका उपाध्यक्ष बेदुराम भुसाललाई पार्टी एकताको पछिल्लो प्रयासबारे बुझ्यौं।
उनले नेकपा माओवादी केन्द्रसँग पार्टी एकता हुन नसक्ने बताए। त्यसको सम्भावनाहरूको चर्चा पनि सेलाइसकेको उनको दाबी छ।
‘उहाँहरू र हाम्राबीचमा धेरै कुरा मिल्दैन। हामी अहिले हाम्रै पार्टी बलियो बनाउने गरी लागेका छौं,’ भुसालले भने,‘एक वर्षभन्दा धेरै भयो होला दुई पार्टीका बीचमा एकताको चर्चा समेत भएको छैन।’
भुसालले पार्टी एकताका लागि यसअघि बनाइएको कार्यदल पनि क्रियाशील नरहेको बताए।
‘हामीले पार्टी एकता हुन सक्दैन भन्ने निष्कर्ष निकालेर नै समाजवादी मोर्चामार्फत् गतिविधि गर्ने निर्णय गरेका हौं,’ उनले भने।
