नेकपा (एकीकृत समाजवादी)का अध्यक्ष माधवकुमार नेपालले जहाँ गएपनि सँगसँगै जाने सहमति गरेर आफूमात्रै स्वर्ग गएको भन्दै प्रधानमन्त्री केपी शर्मा ओलीप्रति कटाक्ष गरेका छन्।
आइतबार प्रधानमन्त्री ओलीले प्रतिनिधि सभामा प्रस्तुत गरेको विश्वासको मतसम्बन्धी प्रस्तावको छलफलमा नेपालले एउटासँग जहाँ गएपनि सँगै जाने सहमति गरेर आफूमात्रै स्वर्ग गएको बताएका हुन्।
'पाँच वर्ष सँगै जाने स्वर्ग गएपनि नर्ग गएपनि सँगै जाने। सुन्दै आनन्द लाग्ने कुरा। तर आफू स्वर्गतिर लाग्यो, अर्कोलाई लात्ती हिर्काएर नर्कतिर पठाइदियो,' उनले भने
उनले प्रधानमन्त्रीलाई आत्मालोचना गर्ने प्रवृत्तिको विकास गर्न पनि ओलीलाई आग्रह गरे।
'तपाईले पनि कहिलेकाहीँ आत्माआलोचना गर्दा सहकर्मीहरू, सहयात्रीहरू, कम्युनिष्ट पार्टीहरू र नेपाली जनताहरू खुशी पो हुन्छन् कि त्यसकारण विगतलाई समीक्षा गर्दै आत्मआलोचना पनि गर्ने फुर्सद निकाल्नुहोला सामान्य अनुरोध,' उनले भने।
उनले ओलीलाई सामान्य अनुरोधबाहेक अरू केही गर्न नसक्ने बताए।
तर नेतृत्वमा पुग्ने व्यक्ति विश्वासयोग्य इमानदार र प्रतिष्ठा कायम गरेको र जनताले गौरव गर्ने आलोचना सुन्न सक्ने हुनुपर्ने नेपालले बताए।
'यदी जनताले स्थायित्व नै खोजेको भन्ने ठानिएको हो भने दुइटा पार्टीको एकता आवश्यकता थियो? एउटै पार्टीले बहुमत ल्याएकै थियो विगतमा यो अनुभव तपाईंमा पनि थियो नि।किन टिकाउन सकिएन, बहुमतको सरकार किन टिकाउन सकिएन? किन समझदारी कायम राख्न सकिएन र असमझदारी हल गर्न सकिएन? यसको अलिकति भएपनि समय निकालेर आत्मालोचनाको भावनामा चलेर काम गर्नुहोला,' उनले भने।