हालै निर्वाचन आयोगले सार्वजनिक गरेको प्रतिनिधिसभाको बन्दसूचीमा रहेको प्रतिनिधिसभाका लागि समानुपातिक सदस्यको नामावलीमा उदयपुर जिल्लाबाट नेपाली कांग्रेसको तर्फबाट मात्र दुईजना महिला सांसद मनोनित भएका छन्।
यसरी मनोनित हुनेमा नेपाली कांग्रेसका केन्द्रीय सदस्य लक्ष्मी परियार र अर्का जिल्ला महासमितिका सदस्य तथा पूर्वसभासद् प्रमिला राई रहेको नेपाल कांग्रेस उदयपुरले बताएको छ।
उदयपुरबाट प्रतिनिधिसभा सदस्यको लागि समानुपातिक कोटामा दुवै महिला मनोनित हुन सफल भएका नेपाली कांग्रेस उदयपुरका प्रवक्ता मदनराज कटुवालले बताए।
अब नेपाली कांग्रेसबाट उदयपुरको प्रतिनिधिसभाको क्षेत्र नम्बर १ बाट प्रत्यक्षतर्फबाट निर्वाचित सांसदमा कांग्रेसका केन्द्रीय सदस्य नारायण खड्कासहित तीनजना प्रतिनिधिसभा सदस्य छन्।
तर, यता जिल्लाका वाम गठबन्धन नेकपा (एमाले) तथा नेकपा (माओवादी केन्द्र)बाट समानुपातिकमा महिला तथा पुरुषसहित दर्जनौँको नाम बन्दसूचीको लिष्टमा राखिएको भएपनि नाम पर्न नसकेकोमा सम्बन्धित उम्मेदवारले व्यापक असन्तुष्टी जाहेर गरेका छन्।
एमालेभन्दा पनि माओवादी केन्द्रबाट धेरैजना नेता र महिलाको समेत समानुपातिक कोटामा नाम रहेको भएता पनि जिल्लामा कोही पनि पर्न सफल नभएको माओवादी केन्द्रका पूर्वसांसद तथा केन्द्रीय सदस्य मणि खम्बुले बताए।
उदयपुरबाट प्रत्यक्षतर्फ २ नम्बर निर्वाचन क्षेत्रबाट माओवादी केन्द्रका सुरेश किराँतीले प्रतिनिधिसभामा विजय हासिल गरेका छन् भने कांग्रेसका तर्फबाट जिल्लाको क्षेत्र नम्बर १ बाट नेकाका नारायण खड्काले विजय हासिल गरेका हुन्।
अब जिल्लाबाट प्रतिनिधिसभामा वाम गठबन्धनका तर्फबाट एकजना मात्र सांसद सदस्य रहेका छन् भने नेपाली कांग्रेसबाट तीन जना पुगेका छन्।
