राज्यको नयाँ संरचनाअनुसार बनेको ५ नं प्रदेशमा सरकार गठनको तयारी शुरु भएको छ ।
संविधान कार्यान्वयनको चरणमा ५ नं प्रदेशमा मुलुककै पहिलो मुख्यमन्त्री यस प्रदेशबाट चयन गर्ने तयारी भएको छ। प्रदेशको मुख्यमन्त्री चयन तथा मुख्यमन्त्रीको शपथ कार्यक्रमलाई प्रभावकारी कसरी बनाउने विषयमा शनिबार एमाले नेतृत्वले प्रदेश प्रमुखसँग छलफल गरेको छ ।
एमाले उपमहासचिव तथा रूपन्देही क्षेत्र नं २ का प्रतिनिधिसभा सदस्य विष्णु पौडेलको नेतृत्वमा पुगेको टोलीले प्रदेश प्रमुखसँग छलफल गरेको थियो। प्रदेश प्रमुखको छलफलपछि नेता पौडेलले आइतबार एमाले माओवादी संसदीय दलले औपचारिक रुपमा प्रदेश प्रमुखसमक्ष सरकार गठनका लागि दाबी प्रस्तुत गरी पत्र बुझाएपछि सम्भवतः तत्कालै अर्थात् सोमबारसम्म मुख्यमन्त्री नियुक्त गर्ने सम्भावना रहेको जानकारी दिए।
प्रदेश प्रमुखसँगको छलफलमा नेता पौडेलसहित एमाले प्रदेश संसदीय दलका नेता शंकर पोखरेल, एमाले केन्द्रीय सदस्य लीला गिरी, संसदीय दलका प्रमुख सचेतक भूमिश्वर ढकाल, भोजप्रसाद श्रेष्ठलगायत ५ नं प्रदेशका प्रदेश मुख्य सचिव शंकर पाठकसमेत थिए।
एमाले प्रदेश संसदीय दलका प्रमुख सचेतक भूमिश्वर ढकालले मुख्यमन्त्रीको शपथ कार्यक्रमलाई प्रभावकारी रुपमा जनताको पहुँचमा पुर्याउने विषयमा छलफल हुँदा प्रदेश प्रमुखको निवास परिसर बाहिर कार्यक्रम आयोजना गर्ने टुंगो लगाइएको बताए। मुख्य मन्त्रीको शपथसँगै तीन सदस्यीय सानो आकारको मन्त्रिमण्डल गठन गर्ने तयारीसमेत भएको उनले जानकारी दिए।
संविधानतः निर्वाचन आयोगले निर्वाचन परिणाम घोषणा गरेको ३० दिनभित्र प्रदेश प्रमुखले बहुमत प्राप्त ठूलो दललाई सरकार गठनका लागि आह्वान गर्ने व्यवस्था रहेको छ।
एमाले प्रमुख सचेतक ढकालका अनुसार माओवादी केन्द्रको आइतबारको बैठकले संसदीय दलको नेता चयनको निर्णय गरेपछि दुवै दलका संसदीय दलका नेताले संयुक्त रुपमा पत्र बुझाउने छन्।
यस प्रदेशमा कूल ८७ जना प्रदेश सदस्यमध्ये एमालेका ४१ र माओवादी केन्द्रका २० जना सदस्य छन्। एमाले–माओवादी गठबन्धनको सहमति अनुसार यस प्रदेशमा एमालेले सरकारको नेतृत्व गर्ने टुंगो लागिसकेको छ। सोहीअनुसार एमाले प्रदेश संसदीय दलले मुख्यमन्त्रीका लागि पार्टी स्थायी कमिटी सदस्य शंकर पोखरेललाई सर्वसम्मत रुपमा संसदीय दलको नेता चयन गरिसकेको छ।
तर, प्रदेशमा प्रमुख विपक्षी नेपाली कांग्रेस प्रदेशले भने अहिलेसम्म संसदीय दलको नेता चयन गर्न सकेको छैन। यस प्रदेशमा नेपाली कांग्रेसबाट संसदीय दलको नेताका रुपमा दाङका डिल्ली चौधरी, कपिलवस्तुका वीरेन्द्रकुमार कनौडिया, रुपन्देहीका अष्टभुजा पाठक, पाल्पाका पार्टी सभापति वीरबहादुर रानालगायत आकांक्षी देखिएका छन्।
माओवादी केन्द्रमा पनि संसदीय दलको नेताका लागि आकांक्षी धेरै भए पनि रोल्पाका कुलप्रसाद केसीको सम्भावना प्रवल देखिएको छ। उनी संसदीय दलको नेता चयन भएपछि यस प्रदेशमा समाभुख पाएको माओवादी केन्द्रले गुल्मीका सुदर्शन बराललाई अगाडि सार्ने बताइएको छ।
कानूनतः सांसद संख्याको २० प्रतिशत नबढ्ने गरी मन्त्रालय गठन गर्नुपर्ने छ। प्रदेश नं ५ ले ९ भन्दा नबढ्ने गरी मन्त्रिमण्डल बनाउने तयारीमा एमाले–माओवादी गठबन्धन छन्। रासस
