प्रदेश नम्बर ३ को पहिलो प्रदेश सभा बैठक आज दिउँसो १ बजे बस्दै छ। हेटौंडास्थित प्रदेश सभा सचिवालयको हल (साविकको क्षेत्रीय शिक्षा निर्देशनालय)मा बैठक बस्न लागेको सचिवालयका सचिव रोजनाथ पाण्डेले जानकारी दिए।
उनका अनुसार बैठकको सुरुमा प्रदेश प्रमुख अनुराधा कोइरालाले संसद अधिवेशन आह्वान गरेको पत्र पढेर सुनाइने छ।
‘प्रदेश सभा सञ्चालनको अन्तरिम कार्यविधि पनि आजै पारित हुन्छ,’ पाण्डेले भने, ‘यही बैठकले सभामुखको चुनावको मिति पनि तोक्छ।’
त्यसपछि बैठकमा सबै दलका प्रतिनिधिले आफ्नो धारणा राख्ने कार्यसूची छ।
पाण्डेका अनुसार बैठकको अध्यक्षता सभाका जेष्ठ सदस्य डोरमणि पौडेलले गर्ने छन्।
देशका सात वटा प्रदेशमध्ये सबैभन्दा पहिला प्रदेश तीनको बैठक बस्न लागेको हो।
यो प्रदेशमा एमालेले एक्लैले बहुमत ल्याएको छ।
