गोपाल पराजुली सर्वोच्चको नेतृत्व गर्न अयोग्य : गोविन्द केसी

सेतोपाटी संवाददाता

काठमाडौं, पुस २७

डाक्टर गोविन्द केसीले अनसन जारी राख्ने भएका छन्।

केसीले प्रधानन्यायाधीशका सम्बन्धमा आफूले उठाएका प्रश्नमा अदालतले छानबिन गर्ने भएपनि अन्य माग सम्बोधन नभएकाले अनसन जारी राख्ने बताएका हुन्।

प्रधानन्यायाधीश गोपाल पराजुली भ्रष्ट र माफिया भएको आरोप लगाउँदै केसीले राजीनामाको माग गर्दै पुस २४ गते अनसन सुरू गरेका थिए। लगत्तै उनीमाथि सर्वोच्चमा अवहेलनाको मुद्दा चलेको थियो। मुद्दाकै कारण सोही दिन पक्राउ परेका केसी बुधबार तारेखमा छुटेका हुन्।

केसीले पराजुली विरुद्धको आफ्नो अभिव्यक्ति अनुसार सर्वोच्चले कागजपत्र झिकाएकाले प्रधानन्यायाधीश पराजुलीले अब सर्वोच्चको नेतृत्व गर्न नमिल्ने समेत बताएका छन्। ‘पराजुलीको आधारभुत योग्यता र नैतिकतामाथि गम्भीर प्रश्न उठेको र त्यसमाथिको छानबिन न्यायिक प्रक्रियामा प्रवेश गरिसकेको अवस्थामा निज कुनैपनि अवस्थामा अब देशको सर्वोच्च न्यायालयको नेतृत्व गर्न योग्य नभएको प्रष्टै छ’, केसीले विज्ञप्तिमा भनेका छन्, ‘निज पदमा वहाल रहेसम्म ती मुद्दा निष्पक्ष रूपमा अगाडि नबढ्ने र न्याय सम्पादन प्रभावित हुने देखिन्छ।’

केसीले आफूले माग गरेको राजीनामा अदालतको न्यायिक प्रक्रियाले पुष्टि गरेको दाबी गरेका छन्। गोविन्द केसीले अदालतमा उभिएर प्रधानन्यायाधीश पराजुलीको योग्यता माथि प्रश्न उठाएका थिए। सर्वोच्चले बुधबार केसीको शैक्षिक योग्यताका प्रमाणपत्र र नागरिकताको प्रतिलिपी झिकाउन आदेश दिएको थियो।

प्रकाशित मिति: बिहीबार, पुस २७, २०७४ ०५:५०

सिफारिस