दाङका हरिचन्द्र गिरिको नाममा दुई वटा विश्व कीर्तिमान छ। उनले हातले टेकेर निर्धारित दूरी विश्वकै छिटो गतिमा पार गरेर कीर्तिमान कायम राखेका हुन्।
उनले पहिलो कीर्तिमान बनाउने क्रममा भर्याङको ५० खुड्किला हातले टेकेर पार गरेका थिए। भर्याङको खुड्किला पार गर्ने क्रममा उनी माथिबाट तल झरेका थिए।
पहिले यो कीर्तिमान १४.५८ सेकेन्डको समयमा थियो। तर हरिले २१ नोभेम्बर २०२१ मा दाङमा भएको एक कार्यक्रममा १२.६५ सेकेन्डमा भर्याङका ५० खुड्किला हातले टेकेर पार गरेका थिए।
चार महिनाअघि अर्को कीर्तिमान बनाए। उनले समथर जमिनमा हातले टेकेर ५० मिटर दूरी पार विश्वकै छिटो गतिमा पार गरेका थिए। यसरी कीर्तिमान बनाउँदा उनले दुई खुट्टाको बीचमा फुटबल राखेका थिए।
दोस्रो कीर्तिमान बनाउँदा हरिले २५.५८ सेकेन्डमा निर्धारित ५० मिटर दूरी पार गरेका थिए।
यी दुवै विश्व कीर्तिमानलाई गिनिज वेर्ल्ड रेकर्ड्सले मान्यता दिएको छ।
८ वर्षको उमेरदेखि उनी हातले टेकेर उभिन सक्ने भएका थिए। हातले यताउता जान थालेपछि उनलाई स्थानीयले ‘उल्टो मान्छे’ भनेर चिन्न थालेका थिए।
हातले टेकेर विभिन्न कीर्तिमान उद्देश्य राखेका हरि नेपाली सेनामा आवद्ध भएपछि भने सफल हुन सके। आर्मीमा आवद्ध भएपछि उनले पर्याप्त अभ्यास गर्ने मौका पाए।
सुरुका दिनमा उनले हातले टेकेर ५० खुड्किला पार गर्दा ५० सकेन्ड समय लगाउँथे। पाँच वर्षको निरन्तर अभ्यासका कारण उनले ५० सेकेन्डको समय १२ सेकेन्डमा झार्न सफल भए।
अहिले नेपालको नाम विश्वमा चिनाउन सफल भएकोमा हरि खुसी छन्। अब विश्वका विभिन्न देशमा आयोजना हुने ‘रियालिटी शो’ मा आफ्नो प्रतिभा देखाउने उनको लक्ष्य छ। त्यसका लागि कठिन परिश्रम गर्ने उनले बताए।
हेर्नुहोस् उनको बारेमा सेतोपाटीले तयार पारेको भिडिओ :-
