मेरो खोजी गर्दै गरेको म
मलाई खोज्दै गरेको म
म खोज्दै गरेको म
हामी भिडको एक म
हामी भित्रको एक म
आज
हिजो झैं
अझै
म खोज्छु मलाई
हराएको छु यतै कतै
आफैभित्र
छु एउटा
देखिन्छ अर्कै चित्र
अभिनय लाग्छ आफ्नै व्यवहार
अनौठो संस्कार
कस्तो छस् सोध्छ संसार
आरामै छु भन्छु
लुकाउँदै विफलता, त्यो हार
म कुन हुँ?
देखिने
कि
लुकेको
दम्भले फुलेको
कि
नरम झुकेको
मान्छेहरू पिच्छे फरक छ व्यवहार
फरक रंग,
रुप,
फरक सार
देखाउँदा देखाउँदै
नभएको आफ्नो नौलो अनुहार
बिर्सन्छु म कुन हुँ कमजोर
या, दमदार !
म 'म' हुँ तर कुन म?
अघि भर्खरै आफ्नो काम गराउन चिल्लो घस्नेवाला म कि
अरुलाई हिलो छ्याप्नेवाला म
कि आफू बाहेक अरु नदेख्ने, नबुझ्ने, नसुन्ने म?
मैले मलाई नचिन्न सक्छु
किनकी
म
धेरै रुप धारण गर्ने असाधारण मान्छे
धेरै प्रतिरुप भएको
तर स्वरुप गुमाएको म
म मान्छे
मान खोज्ने मान्छे
भान पार्ने मान्छे
सान झार्ने मान्छे
खेल खेल्ने मान्छे
तेल खोज्ने मान्छे
झेल रोज्ने मान्छे
धेरै लवज भएको मान्छे
धेरै भाषा
परिभाषा बोकेको मान्छे
तर कुन मान्छे?
त्यो मान्छे
आफूले आफूलाई नचिनेको
हराएको
बिर्सेको
खोज्दै गरेको मान्छे म
यतैकतै कतै आफैभित्र घोत्लिरहेको म
आफ्नै खोजीमा हिँडिरहेको म
हिँडिरहेको म!
-1746009348.jpg)
