हामी जनता
जुन नेताले चढ्छ
उसैलाई बोक्छौँ
हामी जनता
जुन नेताले पेल्छ
उसैको पैतालातिर झुक्छौँ
खराब नेतालाई
भ्रष्टाचार भयो
राम्रो काम गरेन भन्छौँ
यसो गरेन, उसो गरेन
भनेर रोष प्रकट गर्दछौँ
नानाभाँतीका गाली गर्छौं
तर फेरि चुनावमा
उसैलाई भोट दिएर जिताउँछौँ
फेरि गाली गर्न जिताएजस्तो
गाली मात्र गर्न जानेका हामी
गाली गर्ने लत लागिसकेको
असक्षम भन्ने थाहा पाई-पाई
यसले देश र जनताको लागि
गर्दैन भनेर जानी-जानी
प्रचारप्रसारमा लागिपर्छौं
के-के न होला भनि
दिनरात खट्छौँ
तन, बल, मन दिएर जिताउँछौँ
अनि फेरि आफैँले भोट दिई
जिताएको नेताले
केही गरेन भनेर
अनेक दोष दिन्छौँ
दोष दिनकै निम्ति
जिताएको जस्तो गरेर
दोष मात्र दिन जानेका हामी
दोष दिने लत लागिसकेको।
