न म तिमीलाई मेरो सौन्दर्यले
लट्ठ पार्न तयार छु
न तिमी मलाई रातो गुलाबले
अल्मल्याउन बिवश गर
प्रेम सौन्दर्य र गुलाबमा मात्र
कहाँ निहित हुन्छ?
प्रेमले शुभ साईत मात्र किन पर्खन्छ?
प्रेम त अन्त्यहिन र उदार हुन्छ
न यस्ले पल ,घडी, समय कुर्छ
जब यस्को बिजारोपण हुन्छ
तब यो बिना कुनै संकेत अंकुराउन थाल्छ
त्यसैले ए अन्जान प्रिय!
मलाई प्रेमको लेपन लाउने बहानामा
गुलाबको गला नरेट
अनि प्रेम दिवशकै साईत नकुर
कुनै पल तिम्रो स्वच्छ आत्माले
मलाई चाह्यो भने भन
प्रिया म तिमीलाई चाहन्छु
अर्थात् माया गर्छु|
हो त्यो पल चाहे दुःखको होस्
या सुखको होस्
यदि तिमीले तिम्रो निस्वार्थ भावले
मलाई चाह्यौ भने
म तिमीलाई तिम्रो खाली हातमै स्वीकार्ने छु
तर तिम्रो मन/मुटुमा
मायाको साँच्चै मीठो तृष्णा
छट्पटीई रहेको हुनुपर्छ
र तिमीले भन्नु पर्छ,
माया यो खुशीको क्षण तिमीमा
समर्पित छ,
म रातो गुलाबको घाँटी रेट्न चाहन्न
तिम्रो प्राप्तीमा।
