रूपन्देहीको मणिग्रामस्थित नेपाल विद्युत प्राधिकरणको नयाँ मिल वितरण केन्द्रको महसुल संकलन काउन्टर बन्द हुने भएको छ।
अधिकांश उपभोक्ताहरूले डिजिटल प्रणालीमार्फत् विद्युतको महसुल भुक्तानी गर्दै आएको र बाँकी उपभोक्तालाई पनि डिजिटल प्रणालीमार्फत् भुक्तानी गर्ने बानी पार्दै भदौ २ गतेदेखि कार्यालयमा रहेको नगद काउन्टर बन्द गर्न लागिएको हो।
नेपाल विद्युत प्राधिकरणको नयाँ मिल वितरण केन्द्रका प्रमुख रितेश गुप्ताका अनुसार नयाँ मिल शाखा डिजिटल प्रणालीमार्फत महसुल संकलन गर्ने र नगद काउन्टर बन्द गर्ने नेपालकै पहिलो शाखा हुनेछ।
हाल नयाँ मिल शाखामा महसुल भुक्तानी गर्दै आउने ८१ प्रतिशत उपभोक्ताले डिजिटल प्रणालीबाट महसुल भुक्तानी गर्दै आएका छन्।
कार्यालय प्रमुख गुप्ताका अनुसार तिलोत्तमा नगरपालिकाका सबै वडा कार्यक्षेत्र रहेको नयाँ मिल शाखामा करिब ४१ हजार उपभोक्ता छन्।
तीमध्ये ३३ हजारभन्दा बढीले डिजिटल प्रणालीमार्फत् महसुल भुक्तानी गर्दै आएका छन्। बाँकी रहेका ८ हजारमध्ये चार हजार उपभोक्ता इन्टरनेट, मोबाइल र मोबाइल बैंकिङको पहुँचमा रहेको र प्रयोग गर्न अभ्यस्त रहे पनि शाखामै पुगेर महसुल बुझाउँदै आएका छन्।
उनीहरूलाई डिजिटल प्रणालीबाट महसुल बुझाउन आग्रह गर्ने र बाँकी रहेका ४ हजारलाई पनि घर परिवारका अन्य सदस्य, छिमेकी वा ईसेवा काउन्टरहरूबाट पनि भुक्तानी गर्न प्रेरित गरिने कार्यालय प्रमुख गुप्ताले बताए।
सरकारी कार्यालयहरूको भुक्तानी सेवालाई डिजिटल बनाउने सरकारको नीति रहेको र कार्यालयमा पनि महसुल भुक्तानी गर्न आउनेहरूको सङ्ख्या घटिरहेकोले महसुल सङ्कलन काउन्टर बन्द गर्न लागिएको उनले बताए।
‘दुई वर्ष पहिलेसम्म जम्मा ३० प्रतिशत उपभोक्ताले डिजिटल प्रणालीबाट महसुल भुक्तानी गर्दै आउनुभएको थियो, हामीले अरू उपभोक्तालाई पनि डिजिटल प्रणालीबाट भुक्तानी गर्न आग्रह गर्यौँ अहिले ८१ प्रतिशतले डिजिटल प्रणालीबाट महसुल भुक्तानी गरिरहनुभएको छ। बाँकी रहेकाहरूलाई पनि डिजिटल प्रणालीमा जोड्छौँ,’ गुप्ताले भने।
मोबाइल नचलाउने र डिजिटल प्रणालीबाट भुक्तानी गर्नै नसक्नेहरूका लागि कसरी सहयोग गर्न सकिन्छ भनेर योजना बनाई रहेको गुप्ताले बताए।
‘८०/९० रुपैयाँ महसुल बुझाउन त्यति नै भाडा तिरेर आउनुपर्ने बाध्यता छ, त्यसलाई पनि हटाउनुपर्छ भन्ने हाम्रो चाहना हो, उनले भने।
भदौ २ गतेदेखि महसुल काउन्टर बन्द गर्ने भएपछि कार्यालयले अहिले डिजिटल भुक्तानीका लागि उपभोक्तालाई जानकारी गराइरहेको छ।
गुप्ताका अनुसार डिजिटल भुक्तानी गर्न नजानेका उपभोक्तालाई सिकाउने गरी कार्यालयमा ‘हेल्प डेस्क’ स्थापना गरिएको छ।
डिजिटल वालेट कम्पनी तथा बैङ्कहरूको समन्वयमा सञ्चालनमा ल्याइएको हेल्प डेस्कमार्फत् डिजिटल भुक्तानी कसरी गर्ने भन्ने बारेमा जानकारी दिने गरिएको छ।
महसुल काउन्टरबाट कार्यालय समयमा मात्र महसुल भुक्तानी हुने गरेकोमा डिजिटल प्रणालीबाट भने बिहान ८ बजेदेखि राति १२ बजेसम्म जुनसुकै दिनमा पनि महसुल भुक्तानी गर्न सकिने गुप्ताले बताए।
-1746009348.jpg)
