नेपाल चेम्बर अफ कमर्सले मंगलबार बिहान रसुवा नाकामा आएको बाढीको कारण समग्र व्यापार व्यवसायमा गम्भीर क्षति पुगेको जनाएको छ।
चेम्बरले विज्ञप्ति जारी गर्दै टिमुरे क्षेत्रमा तत्कालीन राहत व्यवस्थासँगै दीर्घकालीन संरचना निर्माण, वैकल्पिक पुल निर्माण तथा प्राविधिक पूर्वतयारी गर्न सरकारको ध्यानाकर्षण गराएको छ।
नेपाल–चीन सिमानामा रहेको प्रमुख नाका रसुवागढीको टिमुरे क्षेत्र भएर गत मंगलबार आएको भिषण वर्षाले मानवीय र भौतिक रूपमा ठूलो क्षति भएको छ।
भारी वर्षासँगै आएको बाढीले नेपाल–चीन मैत्री पुल पूर्ण रूपमा बगाएको र रसुवागढी नाकाबाट चीनसँग हुने व्यापारको मुख्य नाका बन्द हुँदा व्यवसायीहरू मर्कामा परेको चेम्बरले उल्लेख गरेको छ।
मालसामान लिएर नेपालतर्फ आउँदै गरेका कन्टेनर सवारी साधनहरू बाढीले बगाउँदा व्यापार तथा व्यवसायमा गम्भीर क्षति भएको चेम्बरद्वारा जारी विज्ञप्तिमा जनाइएको छ।
चीनसँगको महत्त्वपूर्ण व्यापारिक नाका नाका बन्द हुँदा आयात–निर्यातमा ठूलो असर पर्न सक्ने भन्दै चेम्बरले यस्ता जोखिमपूर्ण अवस्थाको दीर्घकालीन समाधानका लागि स्थायी संरचना बनाउन भनेको छ।
त्यस्तै वैकल्पिक नाका व्यवस्थापनमा नीतिगत निर्णय गर्न सरकारसँग आग्रह गरेको छ।
-1746009348.jpg)
