राहदानी विभागले समयमै टेन्डर प्रक्रिया पूरा गरी पासपोर्ट आपूर्तिमा कुनै समस्या नआउने सुनिश्चित गर्ने जनाएको छ।
मंगलबार आयोजित पत्रकार सम्मेलनमा विभागका महानिर्देशक तिर्थराज अर्यालले हाल विभागसँग १० लाख २१ हजार ७०० पासपोर्ट छपाइका लागि बाँकी रहेको र यसले करिब एक वर्षलाई पर्याप्त हुने जानकारी दिए।
विभागले गत नोभेम्बर २८ मा अन्तर्राष्ट्रिय टेन्डर आह्वान गरेको थियो।
प्रारम्भमा जनवरी १२ सम्मको म्याद तोकिएको भए पनि केही जिज्ञासा उठेपछि प्रतिस्पर्धा बढाउने उद्देश्यले फेब्रुअरी ११ सम्म एक महिना थप गरिएको थियो।
टेन्डर कागजातमा आवश्यक संशोधन गरेपछि म्याद थप गर्नुपर्ने माग उठे पनि सार्वजनिक खरिद अनुगमन कार्यालयले प्रतिस्पर्धा बढ्ने भएमात्रै म्याद थप गर्न निर्देशन दिएको थियो।
महानिर्देशक अर्यालले विभागले पहिले नै एक महिना म्याद थप गरिसकेको भन्दै अब फेरि म्याद थप गर्ने सम्भावना न्यून रहेको बताए।
'२०२५ को डिसेम्बरसम्म नयाँ ठेक्का लगाई पासपोर्ट छपाइ सुरू भइसकेको हुनुपर्छ,' उनले भने, 'हामीले कम्पनीहरूको मागअनुसार एक महिना म्याद थप गरिसकेका छौं, अब थप म्याद दिनु पर्ने अवस्था छैन।'
विभागको हालको ठेक्का फ्रान्सको कम्पनी आइडेमियासँग २०२५ डिसेम्बरसम्म कायम रहेको छ।
