बेलायतका प्राय नेपाली स्टेजहरुमा गायकको रूपमा देखा पर्ने मनसुधन थापा मगर र गायिका रेनु रिलामी मगरको ’रौसी..’ बोलको नयाँ लोकगीतमा म्यूजिक भिडियो सार्वजनिक भएको छ।
गायक थापाले उनको युट्युव च्यानलमार्फत बिहीबार भिडियो सार्वजनिक गरेका हुन्। गीतमा शब्द/संगीत श्रीकृष्ण बम मल्लको छ। लण्डनको भर्जिनिया वाटर वरपर एक दिनमा छायांकन सकेर हप्ता दिनमै भिडियो रिलिज भएको छायांकन, सम्पादन एवं निर्देशनको जिम्मा लिएका कुशल श्रेष्ठले जनाए।
निर्देशक श्रेष्ठले यति छोटो समयमा विदेशी भुमिमा म्युजिक भिडियो तयार पार्ने चुनौतीपूर्ण कार्य गर्न सकेकोमा आफु निकै उत्साहित रहेको बताए।
म्यूजिक भिडियोमा कलाकारहरु प्रभु गुरुङ, सुवास गुरुङ, मनसुधन थापा मगर, पुष्पा गुरुङ, मोलिका गुरुङ र सलिना थापा मगरले अभिनय गरेका छन् भने कोरियोग्राफी बेलायतमा सक्रिय एकजना युवा सर्जक प्रभु गुरुङको छ।
सह-छायांकन सुसन नकर्मी र कलर संयोजन नवीन निरौलाले गरेका हुन्। पोष्ट प्रोडक्सन के.के. फिल्म्स् एण्ड मिडिया, लण्डनको छ।
गायक थापाले हालसम्म करिब तीन दर्जन गीत गाइसकेका छन् भने झण्डै ५० वटा गीतमा मोडलिङ गरेका छन्। फिल्म ‘प्रतिबिम्ब’ मा त उनी मुख्य हिरो थिए। बेलायत आउनुअघि मनसुधनले सगरमाथा टिभीमा समाचार प्रस्तोता तथा रिपोर्टर भएर करिब ६ वर्ष काम गरेका थिए।
