कांग्रेस नेताहरूका अनुसार एमालेको तुलनामा माओवादी नेताहरू एकल संक्रमणीय प्रणालीको पक्षमा नरम देखिएका छन् । यद्यपि, बैठकमा माओवादी नेताहरूले सरकार गठनमा ढिलाइ हुँदा समस्या थप बल्झिने भन्दै छिटो विवाद सुल्झाउन जोड दिएका थिए । माओवादीबाट अध्यक्ष पुष्पकमल दाहाल प्रचण्ड, नेता नारायणकाजी श्रेष्ठ, रामबहादुर थापा सहभागी थिए । प्रधानमन्त्री देउवा एक–दुई दिनपछि मात्रै दलबीच छलफल गर्ने तयारीमा रहे पनि माओवादी केन्द्रका अध्यक्ष प्रचण्ड राजधानीबाहिर जानुपर्ने भएकाले शुक्रबार बिहानै बैठक राखेका थिए । यो खबर हामीले आजको नयाँ पत्रिकाबाट लिएका हौ।
दलहरू अब छिटो सरकार गठन गर्न तत्काल राजनीतिक सहमति गरी अगाडि बढ्नुपर्ने दबाबमा छन् । साथै, प्रदेश सभाको समानुपातिक सांसदको संख्या निर्वाचन आयोगले सार्वजनिक गरेपछि अब प्रदेश प्रमुखको नियुक्ति पनि छिटो गर्नुपर्ने हुन्छ । यसकारण पनि अब प्रदेश प्रमुख, राष्ट्रिय सभा गठनको विषयलाई पनि प्याकेजमै टुंग्याउन दलहरूलाई दबाब परेको छ । आ–आफ्ना अडान कायम राखे पनि एक–दुई दिनमा अहिलेकै अध्यादेशलाई राष्ट्रपतिलाई स्वीकृत गराएर जाने र प्याकेजमै सहमति जुटाएर जाने विषयमा दलहरू केन्द्रित हुने देखिएको छ ।
