आगामी २१ मंसिरमा हुने प्रदेश र प्रतिनिधिसभा निर्वाचनका लागि नेपाली कांग्रेस र राष्ट्रिय जनता पार्टी नेपालबीच निर्वाचन गठबन्धन र तालमेल प्रयास असफल भएको छ। संघीय समाजवादी फोरम नेपालसँग मिलेर मधेसवादी गठबन्धन निर्माण गरेको राजपा नेपालले अब लोकतान्त्रिक गठबन्धनका साथै एमाले र माओवादी केन्द्रको वामगठबन्धनसँग प्रतिस्पर्धा गर्ने निष्कर्षमा पुगेको छ। यो खबर सुभाष साहले आजको राजधानीमा लेखेका छन्।
मंगलबार नै मधेसवादी राजपा र फोरमको गठबन्धनले प्रदेश–२ मा सिट बाँडफाँट गरिसकेका छन्। कांग्रेससँग राजपाको वार्ता असफल भएपछि अब सो गठबन्धनले अन्य प्रदेशमा आवश्यकताअनुसार तालमेल गर्ने राजपा नेपालले जनाएको छ।
राष्ट्रिय जनता पार्टी नेपाल र कांग्रेसका बीचमा निर्वाचन क्षेत्रको विषयमा कुरा नमिलेपछि लोकतान्त्रिक गठबन्धनसमेत अन्योलमा परेको छ। कमल थापा नेतृत्वको राष्ट्रिय प्रजातन्त्र पार्टीले झापाबाहेकका स्थानमा गठबन्धन जारी राख्ने निर्णय गरे पनि मकवानपुर कांग्रेसले राप्रपा अध्यक्ष थापालाई मत नहाल्ने घोषणा गरिसकेको छ। बुधबार देउवा र थापाबीच गठबन्धन कायम राखेर अघि बढ्ने समझदारी भए पनि मधेसवादी दलको गठबन्धनमा रहेको राजपाले साथ नदिने बताएपछि बृहत् लोकतान्त्रिक गठबन्धन धरापमा परेको हो। तथापि, कांग्रेस नेताहरूले मनोनयनको दिन (बिहीबार) पनि गठबन्धन र तालमेल प्रयास जारी रहेन बताएका छन्।
प्रधानमन्त्री निवास बालुवाटारमा बुधबार कांग्रेस र राजपा नेपालका शीर्ष नेताबीच तालमेलका लागि छलफल भए पनि सहमति हुन नसक्दा दुवै पार्टी छुट्टाछुट्टै निर्वाचन लड्ने भएका छन्।
प्रदेश २ सहितका तराई–मधेसमा कांग्रेसले तालमेलको प्रयास गरेको थियो। तर, सिट बाँडफाँटमा सहमति हुन नसक्दा शीर्ष नेताको क्षेत्रमा तालमेल गर्न बैठक बसेको थियो। शीर्ष नेताको क्षेत्रमा तालमेल गर्न प्रधानमन्त्री निवासमा बैठक बसेको थियो। बैठकमा कांग्रेस नेता प्रदीप गिरीले धनुषाको ३ नम्बर क्षेत्र कांग्रेस नेता विमलेन्द्र निधिका लागि राजपाले छोडनुपर्ने प्रस्ताव गरेका थिए। धनुषा–३ राजपाले छोडेपछि कांग्रेसले धनुषा–४ मा उम्मेदवार नदिई राजपालाई सघाउने गिरीको प्रस्ताव थियो।
धनुषा–३ मा कांग्रेस नेता निधिका साथै राजपा नेपाल अध्यक्ष मण्डलका नेता राजेन्द्र महतोको दाबी रहेको छ। राजपाले सर्लाही–४ र धनुषा–३ मध्ये एक पाउनुपर्ने दाबी बैठकमा गरेको छ। तर, कांग्रेसले यी दुवै क्षेत्र छोड्न नसक्ने अडानमा छ। सर्लाही–४ मा कांग्रेस नेता डा. अमरेशकुमार सिंहले उम्मेदवारी दिने भएकाले यो क्षेत्र राजपालाई दिन नसक्ने कांग्रेसको अडान छ।
सर्लाही–४ कांग्रेसले छोड्न नमानेपछि राजपा नेता महतो धनुषा–३ मा निधिसँग प्रतिस्पर्धा गर्ने निर्णयमा पुगेको राजपाका एक नेताले जनाएका छन्।
बैठकमा कांग्रेस नेताको अडान सुनिरहेका राजपा नेपाल अध्यक्ष मण्डलका संयोजक महन्थ ठाकुरले आक्रोश व्यक्त गर्दै कांग्रेसको प्रस्ताव अस्वीकार गरे। ठाकुरले धनुषा–३ र सर्लाही–४ मध्ये कांग्रेसले एउटा क्षेत्र पनि नछाड्ने भएपछि राजपाले आफ्नो उम्मेदवारी दिने भन्दै बैठकबाट निस्केका थिए। ‘कांग्रेसले जे भन्छ, त्यही गर्दै जानुपर्ने ? कांग्रेसले धनुषा–३ नछाड्ने, सर्लाही–४ पनि नछाड्ने भएपछि गठबन्धन कसरी हुन्छ ?’ बैठकमा ठाकुरले देउवासँग राखेको आक्रोश उद्धृत गर्दै राजपाका एक नेताले भने।
राजपा नेता महतोले धनुषा–३ बाटै उम्मेदवारी दिन बिहीबार जनकपुरतर्फ जाने तयारी गरेको बताए। आफूले कुनै हालतमा पनि यो क्षेत्र छाड्न नसक्ने बताएका छन्।
