अष्ट्रेलियामा अध्ययन र मोडलिङ गर्दै आएका सुरज पौडेलले फिल्म 'पीआर' मार्फत नेपाली रजतपटमा डेब्यु गर्दैछन्।
आउँदो शुक्रबारदेखि प्रदर्शनमा आउन लागेको फिल्मले विदेशमा अध्ययनरत नेपाली विद्यार्थीले भोग्ने मनोवैज्ञानिक, आर्थिक र सामाजिक दबाबको कथा वाचन गर्छ।
निर्देशक शोभित बस्नेतकी छोरी सलिना बस्नेतसँगको चिनजानमार्फत अडिसनमा पुगेका सुरजले स्क्रिप्ट पढेपछि फिल्ममा जोडिने निर्णय लिएका थिए। फिल्मको कथावस्तु आफ्नै अष्ट्रेलिया बसाइको सुरूवाती संघर्षसँग मेल खाएको उनको भनाइ छ। अष्ट्रेलियामा अध्ययनरत नेपाली विद्यार्थीको वास्तविकता कथामा पाएको उनले बताए।
उनले शोभित बस्नेतसँग काम गर्दा निकै सहज महसुस भएको सुनाए। 'डेढ महिनाजति वर्कसप गरेर मात्रै फ्लोरमा गयौं। वर्कसपले क्यारेक्टरमा बस्न, संवाद बुझेको अनुसार प्रस्तुत गर्न र आत्मविश्वास बढाउन धेरै मद्दत गर्यो', सुरजले भने।
शोभित बस्नेतले फिल्म क्षेत्रको अनुभवका आधारमा आफूलाई आत्मविश्वास र काम गर्ने सहज वातावरण दिएको उनले बताए। 'अरू कसैसँग भएको भए यति सहज हुने थिएन होला,' सुरजले भने।
अष्ट्रेलियामा पढाइ, काम र क्रिकेटको व्यस्तताकाबीच पनि निर्देशकले सबै कलाकारको समय अनुकूल सुटिङ तालिका मिलाइदिएकाले काम गर्न सम्भव भएको उनले बताए।
सुरजले विदेशमा बसे पनि राम्रो कथा र प्रोजेक्ट पाएको खण्डमा नेपाल आएर अभिनय यात्रालाई निरन्तरता दिने प्रतिबद्धता व्यक्त गरे। फिल्म ‘पीआर’ मंसिर २६ गतेदेखि प्रदर्शनमा आउनेछ।
-1746009348.jpg)
