अर्जुन घिमिरे (पाँडे) को निर्देशनमा बनेको फिल्म 'झरीपछिको इन्द्रेणी' को ट्रेलर सार्वजनिक भएको छ।
आइतबार आयोजित कार्यक्रमकाबीच झन्डै ३ मिनेटको ट्रेलर रिलिज गरिएको हो। ट्रेलरले फिल्मलाई एक पारिवारिक तथा सामाजिक ड्रामाको रूपमा चित्रण गरेको छ। यसमा एक वडा सचिवको परिवारको कथालाई केन्द्रमा राखिएको छ।
सन्तानको अस्ट्रेलिया सपना, पारिवारिक प्रेम, विछोड र सामाजिक संघर्षको कथा फिल्मले भन्ने ट्रेलरले संकेत दिन्छ। ट्रेलर हेर्दा फिल्मले एउटा सामान्य मानिसले आफ्नो स्वाभिमान र परिवारको रक्षाका लागि गर्ने संघर्षको कथा पेस गरेको बुझ्न सकिन्छ।
दुःखको 'झरी' पछि आउने खुसीको 'इन्द्रेणी' को प्रतिक्षा नै फिल्मको मुख्य सार रहेको ट्रेलरले संकेत गर्छ। यसले भ्रष्ट्राचार र बेथिति विरूद्धको कथालाई समेत बलियोसँग प्रस्तुत गरेको ट्रेलर हेर्दा अनुमान मिल्छ।
विशेषगरी, 'झरीपछिको इन्द्रेणी' मार्फत अभिनेता गणेश उप्रेतीले करिब ९ वर्षपछि नेपाली रजतपटमा कमब्याक गरेका छन्। टिजरमा उनलाई एक परिपक्व र संघर्षशील पात्रको रूपमा देखाइएको छ।
शीर्ष भूमिकामा अर्का अभिनेता रमेश उप्रेतीको पनि अभिनय छ। फिल्म केवल मनोरन्जन मात्र नभइ समाजको यथार्थ चित्रण पनि भएको निर्माण पक्षको भनाइ छ।
फिल्ममा गणेश उप्रेती र रमेश उप्रेतीका साथमा दीपाश्री निरौला, प्रकाश घिमिरे, सरिता गिरी, निर्मल शर्मा, देशभक्त खनाल, अर्जुन घिमिरे, प्रियना आचार्यलगायतको अभिनय छ।
बिमोञ्चम दवाडी र जेसिका पोखरेलले यसै फिल्ममार्फत नेपाली रजतपटमा डेब्यु गरेका छन्।
अनिसा सेन्दाङ लिम्बु निर्माता रहेको फिल्मको सह-निर्मातामा अनु थापा, पंकज खड्का, राम कार्की, श्रीजना खड्का र सुवास शर्मा छन्।
नागराज इन्टरटेन्मेन्टको प्रस्तुति रहेको 'झरीपछिको इन्द्रेणी' आगामी पुस ४ गतेबाट देशभर प्रदर्शनमा आउने तयारीमा छ।
-1746009348.jpg)
