बंगलादेशमा जारी एसिसी इमर्जिङ टिम्स कप क्रिकेटमा भारतलाई हराउँदै अफगानिस्तान सेमिफाइनलमा प्रवेश गरेको छ। बिहिबार चिट्गाउँमा भएको समूह चरणको अन्तिम खेलमा बलियो प्रतिद्वन्द्वी भारतलाई २ विकेटले हराउँदै अफगानिस्तान राम्रो रनरेटका आधारमा सेमिफाइनलमा प्रवेश गरेको हो।
टस जितेर पहिले ब्याटिङ गर्दै भारतले निर्धारित ५० ओभरको खेलमा ८ विकेट गुमाउँदै २४२ रन मनाएको थियो। २४३ रनको विजयी लक्ष्य लिएर मैदानमा आएको अफगानिस्तान इमर्जिङ टिमले ४६.३ ओभरमा ८ विकेट गुमाएर लक्ष्य पुरा गर्यो।
एसियाली क्रिकेट परिषद् (एसिसी) को आयोजनामा भइरहेको उक्त प्रतियोगितामा चार एसोसिएट राष्ट्र नेपालसँगै मलेसिया, अफगानिस्तान र हङकङ तथा टेष्ट मान्यताप्राप्त राष्ट्र बंगलादेश, पाकिस्तान, श्रीलंकाका र भारतका तेइस वर्षमुनिका खेलाडीको सहभागिता थियो।
समूह ए बाट समूह विजेताको रूपमा श्रीलंका र उपविजेताको रूपमा अफगानिस्तान सेमिफाइनलमा प्रवेश गरेको छ भने समूह बी बाट पाकिस्तान र बंगालदेश सेमिफाइनलमा प्रवेश गरेको छ।
